He whakatūpato ōkawa kua whakatakotoria e Te Tari Tai Whenua ki Te Pātaka Ohanga, whai muri i tāna whakatewhatewha i te kamupene tūmataiti rā a Te Poari Matua o Te Kohanga Reo.
He kōrero ēnei kua puta, ao ake i tā Te Tari Hara Tāware whakatakoto i āna kitenga arotake i Te Pātaka Ōhanga e mea ana, karekau he hara ā ture i kitea.
O ngā arotake e rua, ko tērā a te Tari Tai Whenua i kokiritia tuatahitia, ka mutu, he tari kāwanatanga e hangai ana te titiro ki ngā tarahiti mana tākoha.
E tika ana he whakatūpato ōkawa kua whakatakotoria, ā, kua whakarārangitia e te tari ētahi whakarerekētanga me mātua whakatinanatia e te poari o TPO kia tika ake ai tana noho i raro i nga ture.
Me oti ēnā hei te rua tekau ma tahi o tērā marama, ki te kore kei tangohia pea tā rātou mana tarahiti tākoha.
Kāti, mō te taha ki te tari hara tāware, e tika ana kua whakawāteahia ngā mahi takahi ture i Te Pātaka Ōhanga.
E mōhiotia ana nā te Minita, nā Hekia Parata te Tari Hara Taware i karanga, ā, e ū tonu ana ia ki tēnā whakatau me te kii ake i te rangi nei ko te mea nui, me kaha tonu te poari matua ki te whakahōu i tōna hanga.
E rua nga whakatewhanga i kōkiritia, ao ake i ngā māharahara ā tētahi rōpū kotahi, he kāhui kohanga reo neke atu i te rima tekau nō Mataatua/Tauranga Moana.
Kaore rātou i whai i ngā tikanga nā rātou nei i tāmoko ngā tikanga hei whāinga mō ngā kohanga reo.
Ko ngā pūtea taurewa i tukuna ki ētahi kaimahi me ō rātou whānau i Te Pātaka Ōhanga tētahi aronga o te Tari Hara Taware.
He pūtea kotahi rau whitu tekau mā iwa mano tāra.
E ai ki te whakatewhanga, nā runga i te whānui o ngā here whakapau pūtea a Te Pataka Ōhanga, kāore he take o te koke tonu i te arotake.
Mō te taha ki ngā kāri nama, e ai ki te arotake, i hāngai ētahi ki ngā whakapaunga whaiaro pēnei i te pueru Trelise Cooper me te kaka mārena kotahi mano tāra.
He mea hoko nā te toihau o mua nā Lynda Tawhiwhirangi.
Hōi, e whakapono ana te Tari Hara Tāware, he hapa noa, ka mutu, i whakahokia e ia te pūtea.
Kāti, nō te arotake a te Poari Matua, kua tapahia inaianei ngā kāri nama katoa, āpiti atu i panaia a Lynda Tawhiwhirangi i tōna tūranga.
Hēoi, mo te taha ki te whakatewhanga a te Tari Taiwhenua, kua whakatakotoria tētahi whakatūpato ōkawa.
Āpiti atu, kua whakarārangitia ētahi whakarerekētanga me mātua tutuki i a rātou.
Ki te kore, ka tangohia pea tō ratou mana tarahiti tākoha.
Kei te haere tonu te arotake mo Te Poari Matua.
He kongakonga noa ngā whakamahuki kua whakapuakitia e Te Tari Taiwhenua, hēoi, ko te mea nui, mā ngā whānau kohanga e whai reo ki te poari whakahaere.
He huarahi e takahia ana i tēnei wā, ao ake i te hui a Kingi Tuheitia.