Ko te raru kore mahi, he take matua i te rohe pōti Māori o Te Waiariki. E ai ki ngā rangahau tatau pōti a Whakaata Māori, e mārakerake ana te kite atu ko wai rā e tino hiahiatia ana e te nuinga o te rohe nei ki te whakatika i tēnei raru.
Ki te tū te pōtitanga āpōpo, ka toa i a Reipa, te pōti-ā-rōpu i Te Waiariki. E toru tekau ma rima ōrau o te hunga i uia e tautoko ana i a Reipa hei kāwanatanga.
E rua tekau mā ono ō-rau te tautoko ki Te Pāti Māori. Tuatoru mai, ko Ipurangi Mana, he tekau mā whā ō-rau te nui o te tautoko, kātahi, ko Nāhinara i runga i te tekau mā tahi ō-rau, ko Aotearoa Tuatahi i runga i te waru ōrau.
E rima ōrau noa iho te tautoko ki Ngā Kākāriki, he kotahi ō-rau ki te rōpū Conservative, ā, he kore noa ki a ACT me United Future.
Ko Te Ururoa Flavell tonu te kai-tono e kaingākaunuitia ana. Kei mua noa atu ia i a Annette Sykes o MANA mā te rua tekau mā iwa ōrau.
E aru atu ana a Rawiri Waititi o Reipa, he tekau mā whitu ōrau te tautoko ki a ia. Ā, e rua ō-rau noa iho te tautoko ki a Pat Spellman.
O ngā rohe pōti Māori katoa, kei te rohe pōti nei o Te Waiariki ngā tatau kikino rawa atu mō te tokomaha o te hunga koremahi, nō reira ko te tino pātai ko tēnei, he aha rā ngā kaupapa here a ngā rōpū tōrangapū ki te whakatika i tērā, ā, e whakapono ana ngā kaipōti ki tā rātou e taunaki ai?