E wero atu ana Te Kura Kaupapa Māori o Hoani Waititi ki ngā kura Māori, rūmaki reo hoki kia whai whakaaro ki te wai, he kaupapa e hāpaitia ana e Healthy Families Waitakere.
Kua takoto ake te mānuka i Te Kura Kaupapa Māori o Hoani Waititi Marae kia pāpare ngā kura o te motu i ngā inu hukahuka ki rāhaki.
Ko tā tētahi tauira, ko tā Tuake Pohatu, "Me wero ki ngā kura, kia inumia te wai, kia hauora te tinana."
I te tau rua mano ngahuru mā rua, rima tekau mā rima ōrau te tatauranga mate momona i waenga i ngā tamariki Māori, uri moutere hoki. Ko tā te tūmuaki o Hoani Waititi, ko te kai huka te mate.
"Ka whakaaro ana koe mo tātou te iwi Māori tētahi o ngā tino mate o te iwi Māori e whakataumahangia tātou ko te mate hukahuka me te mate momona, ko te tīmatanga o tēra ko te huka."
Nā tētahi tauira o te wharekura, nā Tuake Pohatu tēnei haka i tito, he tohu o te tū a Hoani Waititi hei kura wai Māori tūturu anake.
"Etahi o ngā kupu e kī ana mā te wai e ora ai te tīnana, mā te wai hoki e ora ai te wairua, e tipu matomato ai ngā hua whenua, ngā hua rākau a Haumie-tiketike."
Nā te tautoko a Healthy Families, Sport Waitakere me He Oranga Poutama tēnei kōrere wai hou i tuku ki te kura.
E ai ki a Rua, "Ka hurei ngā tamariki nā te mea kua roa kē rātou e pātai ana, kei te kī mai ētahi kua whitu kē ngā rātou e īnoi ana, e tono ana kia whiwhi puna wai pēnei i te kounga o tērā mea."
Hei tāpiri ake ki te rautaki hauora, e whai huruhuru ana rātou kia rere ai he kaupapa whāngai tamariki.