Kua tae atu te tokomaha o ngā uri o Tainui ki te Koroneihana Tuangahuru Mā Ono, ki te kawe i ō rātou tini mate ki raro i te maru o te Kiingitanga, whakamaharatia ai. Inā hoki te huhua o ngā mate i waenga i a rātou i tēnei tau tonu, hēoi i rongo rātou i te apakura me te pōuri, ā, me te heke hoki o ngā roimata o Ranginui.
Kua toru tau e noho tārewa ana te hui whakanui i te Koroneihana o Kīngi Tuuheitia Pootatau Te Wherowhero Te Tuawhitu, nā whai anō e ū tonu ana te Kiingitanga ki ngā kupu whakatūpato a te Kiingi i runga i ngā āhuatanga o te mate urutā.
“Amohia ake te ora o te iwi, ka puta ki te wheiao” Rahui Papa. “Kua noho mai ko ētahi o ngā here e kore nei e rērere te mate urutā ki waenganui i a tātou”. Ka noho pūmau ngā kaiwhakahaere o te hui ki ngā whakahaerenga haumaru, kia ora ai te mana o ngā tāngata ka tae atu.
Ahakoa ngā whakatūpatotanga me ngā āwangawanga, ka tū tonu ngā tīkanga o tēnei hui, arā ko te kawe i ngā mate o te tau, te whakakotahitanga me te aroha rere noa.
E ai anō ki a Papa, he ope kei te whakarite tonu te haere ki te poroporoāki i tētehi o te Tekaumārua o Kīngi Tūheitia, ki a Tā Toby Curtis, kei te poho o Rākeiao, i Rotoiti e tangihia ana. Nui te korero a Papa mō te mana nui o Tā Toby, tētehi ko āna tohe mōtika mō ngā kaupapa Māori ki ngā tini āhua. I mate a Tā Toby i te Tūrei i tōna kāinga, e 83 tau te pakeke.
