$13m ka riro ki te reo Māori

Regan Paranihi

$13 miriona tāra kua riro nei i Te Hiku Media, te whare pāpāho toa o Te Taitokerau, mō tā rātou kaupapa e kīa nei, ko Papa Reo. 

He pae pāho matarau a Papa Reo hei whakamahi i te reo Māori i ngā pūrere matihiko. 

Hei tā te Tāhuhu Rangapū o Te Hiku Media, hei tā Peter-Lucas Jones, he huarahi e ora ai te reo Māori i te ao hangarau. 

“Mehemea e kore e oti i a tātou te whakatūturu i te reo Māori hei reo i roto i te ao hangarau, kāore he anga whakamua mō te reo."

E ai ki a ia, “Kua taunga kē a Te Hiku Media hei kaitiaki i ngā kōnae kōrero Māori me ngā kaupapa nā ngā iwi i arataki hei whakatairanga, hei whakatipu hoki i te reo Māori me ngā tikanga Māori.”

Nō te whakatūnga o te whare pāpāho nei i te tau 1991, kua ū hoki rātou ki te kōrero i ā rātou kōrero ā iwi motuhake ake o Te Taitokerau.

"Tino ora ana tēnei kaupapa i te kaha o te tautoko o ngā kuia me ngā kaumātua o tō mātou rohe, engari ehara i te mea e mahi ana mātou i tēnei mahi mō mātou anake. Kahore, mō tō tātou reo Māori tēnei."

I toko ake te whakaaro mō tēnei Papa Reo i tētahi hui ā iwi i te tau 2013. 

“Ko te ia o taua mōtini ko tēnei, rapua he huarahi e ora ai te reo Māori i te ao hōu, i te ao hangarau, i te ao matihiko. Ko te whakaako i ngā rorohiko i te mātauranga o te kōrero Māori, ki te māramatanga o te kōrero Māori. ”

Mā te whakangaotanga pūtea nei ka taea te whakakotahi i ngā mana whakaako reo, i ngā mātanga pūrere hoki nō ngā tōpito o te ao ki te waihanga i tēnei pae pāho matarau. Kei roto hoki i te kaupapa nei, ko ētahi ara whanaungatanga ki ngā kura mātauranga hei whakamarumaru i ngā ākonga tohu kairangi, hei tautoko i ngā paetahi kairangi anō hoki. 

Ko te reo pākeha, ko ngā reo o Te Moananui-a-Kiwa anō hoki ka āpitihia atu ki tēnei kaupapa hei taunaki tonu i te tipuranga o ngā reo maha ki Aotearoa.