Ahakoa kotahi anake te tauira, ka tūwhera tonu a Hato Pētera i tēnei tau

Te Kuru o te Marama Dewes

Kua heke te tatau o ngā tauira ki Hato Pētera, ināianei i tōna tau iwa tekau, otahi anake te tauira. Heoi ahakoa tēnei, he rua rau mano tāra ka tukuna e te Tāhuhu o te Mātauranga kia noho tūwhera ai te kura.

Nā te Tāhuhu o te Mātauranga tētahi kaikomihana i tohu ki te kura. Koia ko tā te kaikomihana a Lex Hammil, ko te pūtea nei he utu i ngā nama o te kura arā kia kā tonu ngā rama.

Tokowhā ngā kaiako, kōtahi te kaimahi whakarite, heoi ko te pūtea nei he tautoko motuhake i ngā whakahaeretanga o te kura, ehara i te utu kaiako.

Nō te tau kua hipa kati ai ngā hopuni moe o te kura. Ko tā te Tāhuhu o te Mātauranga ka noho motuhake ngā wāhi moe, arā, ehara i a rātau te mahi utu i ngā nama a ngā hopuni rā.

Kia whiua te pātai ki a Hammil mehemea rānei ka tūwhera tonu ngā tatau o te kura haere ake nei, ko tā te kaikomihana ka noho tūwhera tonu ai te kura tae rawa ki te wā e whakatau ai te hāhi me te Minita Mātauranga i te huarahi ki mua, heoi ka haere tonu ngā mahi i tēnei tau.