Ahakoa ngā taumaha i ngā tau, kei te tū motuhake te kura

Te Kuru o te Marama Dewes

Kei te whakanui Te Kura Kaupapa Māori o Ngā Uri a Māui ki Tūranga Nui a Kiwa i tōna huritau rua tekau mā rima. Heoi, arā tonu ngā taumaha kua amohia e ngā whānau kia whai kura e rūmaki a rātau tamariki ki roto i te reo Māori.

Ehara i te wāhi ako noa mā ēnei tauira, engari ia ngā hua o tēnei kura, kei tua atu.

Mai i tōna nohinohitanga a Nekoia Forrester e ako ana i raro i te maru o TKKM o Ngā Uri a Māui, “Ko te mea whakahirahira rawa atu ki ahau ko te whakatauira i ngā mātāpono o Te Aho Matua, arā ko te mahi tuakana teina, ko te whakawhanaunga atu ki a rātau mā ki tērā taha.”

Nō te tau 1993 timiata ai ngā mahi ki rō hēti, ā, ehara i te mahi hanga noa kia tatū mai ki tēnei o ngā pae.

He kaiako a Rongomai Smith, ko tāna, “Timata rā tēnei kaupapa i te hēti o Pāpa Ian, piki anō ki a Te Kuri a Tuatai, ka piki anō ki te whare karakia i te tiriti o Ormond, piki anō ki tētahi kura Pākehā ki Iriminita, koina anahe te kura auraki Pākehā i whakaae i tautoko mai i tēnei kaupapa Māori i Tūranga nei.

Nō te tau 1998 tūwhera ai te kura me ōna whare hou ki Mangamōteo, nā te hāhi Ringatū te whenua i tuku atu.

“Ka hūnuku mai tēnei kaupapa ki tēnei whenua nei ki Mangamōteo, engari i konei kāre i whakaaetia e ngā kakī whero o te wāhi nei kia tū mai tēnei whare tēnei kaupapa Māori ki tēnei whenua Māori,” tā Smith.

Nōnātata nei whakanui ai ngā pakeke me ngā whānau nā rātau i tū ai te kura.

Ināianei, neke atu i te 240 ngā tauira mai ngā reanga nohinohi ki ngā tauira wharekura.

Koia tā tētahi tauira, “Ka taea au ki te ako i ngā akoranga pērā ki te pāngarau, tuhituhi, pānui.”

Hei tā tētahi atu tauira, “Kite aku hoa, te ako i te reo Māori.”

“Kua rua ngā whakatipuranga ngā reanga o tōku whānau kua kuraina ki konei nā reira kei te haere tonu tērā āhuatanga ki roto i taku whānau,” te kī a Nakoia Forrester.

Kei tāna tau whakamutanga a Nakoia Forrester, arā kei te pīrangi ia kia haere ki te ako i ngā mahi whakaako kaiako kātahi ka hoki mai ki te whakahoki i ngā painga ki tōna kura.

E whanga tonu ana te kura kia tutuki ai te oati a te Kāwanatanga i ngā tau e rua ki mua, arā ko tā te Kāwanatanga kītaurangi he pūtea tautoko ka tukuna kia whakatūria ai he whare hākinakina ina eke ai ki tua atu o te rua rau tauira.