Ārā ētahi taipitopito hōu mō ngā whakapae ki runga i te Poari Matua o te Kōhanga Reo

Arā ētahi taipitopito kāore anō kia mōhiotia whānuitia mō ētahi whakapae taumaha kua ūhia ki runga i te Poari Matua o te Kōhanga Reo.

Koia rā kua puta i te whakawātanga kua haria ake e tētahi mema poari, e Toni Waho ki Te Kōti Teitei o Te Whanganui-a-Tara.

Ko ngā whakapae hōu mō te raweke pūtea i kōkiri i te arotake a Te Tari Hara Tāware.

He whakapae i ahu mai i a Rakai Tāwhiwhirangi, e ai ki te whakapuakanga whakapae a Toni Waho i te Kōti Teitei.

Ko Kahurangi Iritana Tāwhiwhirangi te māmā o Rakai Tāwhiwhirangi.  Ko Lynda Tāwhiwhirangi tana hoa rangatira, i panaia i te tūranga toihau o Te Pātaka Ōhanga mō ētahi atu whakapae raweke pūtea.

Nā Te Kāea tonu i whakapāho i te marama o Huitanguru, i te rapu pūtea whakawātea a Lynda Tāwhiwhirangi, i ngā rau mano tāra.

I te rangi nei i haere ake mātou ki te whare o Rakai me Lynda Tāwhiwhirangi ki te kōrero mō tēnei take.

Ko Druis Barrett tētahi o ngā mema tokotoru i taua wā o te Poari o Te Pātaka Ōhanga.  Karekau ia i whakaae kia tukuna he pūtea whakawātea.

Nā wai rā i ngana kia panāia a Druis Barrett i taua poari, engari kāore i tutuki.

Ko Druis Barrett i tae ake ki te Kōti Teitei ki te tautoko i a Toni Waho.

E ai ki a Toni Waho i pirangi ia kia arotakengia ngā whakapae a Rakei Tāwhiwhirangi.

Heoi, hei tāna i aukati, i karo rānei tērā e Tina Olsen-Ratana.  Āpiti atu, e ai ki a Waho, i tohutohu a Tina Olsen-Ratana ki ngā mema poari kia whakangarohia ngā pepa e whakarārangi ana i ngā whakapae a Rakai Tāwhiwhirangi.

E whakahē ana a Tina Olsen-Ratana i aua whakapae.

Ko tētahi whakapae taumaha a Toni Waho e mea ana i whakakōtiti a Tina Olsen-Ratana i nga whakaaro o ngā Minita.

I tētahi hui a ngā minita me te Poari Matua, hei tā Toni Waho, karekau i whakapuakitia ngā whakapae hōu raweke pūtea.

E whakahē ana a Tina Olsen-Ratana i tēnā.

Heoi, e mōhiotia ana i puta ngā Minita i taua hui me te kōrero ki te hunga pāpāho - katoa, katoa, e pai ana te Poari Matua.

I te rā whai muri, i karangatia Te Tari Hara Tāware e Hekia Parata na ētahi whakapae hōu raweke pūtea.

He whakapae ēnā i ahu mai i te reta o Toni Waho.

Koia te pūtake o tā te poari hiahia pana i a ia.  Hei tā rātou i takahi a Toni Waho i te mana o te poari mā te whakamōhio atu i ngā whakapae ki ngā Minita.

Ka mutu, e ai ki a Toni Waho i mate ngā mema poari ki te tuku oati wahangū kia kaua ngā whakapae e whākina ki tangata kē atu.

E whakaae ana a Tina Olsen-Ratana i herea ngā mema poari ki te waitohu whakaaetanga wahangū, engari kei te whakahē ia i te toenga o te whakapae.

Kāore anō te rā kia whakatauria e tū ai anō tēnei take ki te kōti.