Arā tonu te karanga ki te hunga kite i te tukinga waka mōrearea ki Muriwai

E karanga atu ana te Ope Pirihimana ki te hunga i kite rā i te tukinga waka mōrearea i Muriwai, i mate ai ētahi tāne tokowhā, i te takahuringa o tō rātou waka wiira whā ki tātāhi.

Pahemo katoa te hunga i whai tūru ki te taraka Mitsubishi Pajero , me te mea hoki rā, hei tā Tekihana Trevor Beggs o Te Ope Pirihimana o Te Waitemata, e whakapae ana, nā te horo o te haere, i raru ai te taraka. 

Hei tāna, i tuki rā te motoka i tētahi mea, ka taraiwa rānei ki runga i ngā onepū mōrearea. Nā wai, ka takahuri rā te motoka e hia kē nei ngā wā, ā, peia atu ana ngā kainoho katoa ki waho mai roto mai i te taraka.

E toru tekau mā tahi ngā tau o ngā tokorua, he rua tekau mā whitu, mā ono hoki ngā tau o ngā pārurenga.

I tēnei wā tonu, kāhore e mōhiotia ana nā wai te motoka i hautū i te ahiahipō o nanahi.

Hei tā Beggs anō, e mahi tahi ana rātou me ngā whanau pani ki te rapu ake nō hea rā ngā pārūrenga, tā te mea, he rerekē katoa o rātou ingoa whānau.

Kainga katoa te taraka e ngā tai o te moana.

He mea tō mai ngā waihotanga mai e te tarakihana hei arotakenga mā te Wahanga Tukinga Waka Mōrearea a Te Ope Pirihimana o Waitemata.

Ko tā Beggs, kua kōrerō rātou ki ētahi o te hunga i kite i te tukinga taraka nei, ēngari e whakapono ana rātou, arā tonu ētahi atū ka tāea pea te tuku atu i ētahi kōrerō anō mō te kēhi nei.

E whakamōhio tonu ana te ope pirihimana i ngā whānau pani, ā, e tumanako ana kia taki rā ngā karakia e hikitia ai te tapū ki te wāhi i raru ai te taraka, ako ake nei