E āmine atu ana a Nāhinara ki te matapaki mēnā ka hono tahi rātou me te Pāti Māori

Ahakoa ka tāea e Nāhinara te kāwana koia anahe me tōnā kotahi, ko te Pirimia a John Key rātou ko ngā Mema Paremata o runga o roto i te Rōpū, ka hui tahi me ngā hoa haere e tūmanakotia ana hei hoa haere kāwanatanga i tēnei wiki tonu, ā, ko Te Pāti Māori tētahi o ngā Rōpū iti e tōru e whai tūru ana ki te tēpū whiriwhiri.

Tīmata ana ngā whiriwhiringa kōrero a John Key i te rā nei me te harirū i te ringa o te kaiārahi o Te Rōpū United Future.

Ko United Future, Te Pāti Māori me Act ngā rōpu e pōhiritia ana e te Pirimia, kia wānangahia rā te whakaaro hei hoa haere mō Nahinara i roto i te Kāwanatanga hou.

Ahakoa e ono tekau mā tahi ngā tūru kotahi rau rua tekau mā tahi o Pāremata ka riro i a Nāhinara, he tāpokopoko rawa te tai mō te hoariri, ina pakari ai tōna hononga me ngā rōpū e toru nei.

Ko Dunne, ko te mema pāremata waewae tapu, a David Seymour o te rōpū ACT rātou ko te kaiārahi o Te Pāti Māori, a Te Ururoa Flavell, ngā whakaihuwaka o roto i a rātou rohe pōti, ā, nā te tautoko i puta mō te Pāti Māori, ka tō mai anō he waewae tapu Māori ki Pāremata, koia ko Marama Fox.

Hei tā Te Ururoa Flavell, ka wānangahia ngā tūmanako o te Pāti Māori e ngā taumata teitei o te Pāti i tēnei rā tonu, ā, hei apōpō ka whai wāhi atu ai rātou ki te aki i ngā rau tūmanako o te Pāti me te Pirimia.