E aro atu ana te ture auahi kore ki rō waka ki ngāi Māori, Pasifika hoki.

Tema Hemi

He ture hōu e whakakore i te tangata te momi hikareti, hikareti tāhiko rānei ki rō motoka mehe tangata kei raro iho i te tekau ma waru te pakeke kei roto. E matapaetia ana ka pāhi te ture nei hei te mutunga o tēnei tau ā ka āhei ngā pirihimana te whakatū waka, te tuku whaina rānei. 

E kūraruraru ana a minita Jenny Salesa me tana kī, e hōrakerake ana ngā tamariki o Aotearoa Māori mai, Pasifika mai hoki, i te momi hikareti ki rō motoka. Kei a ngā pirihimana te tikanga ki te tuku whakaōhiti, te tuku i te tangata ki ngā rātonga auahi kore, tuku whaine rānei mō te rima tekau tāra ki te hunga hāmine i tēnei ture. I te tau rua mano tekau, i tohutohu atu e Te Kōmiti Whaiti take Māori ki te kāwanatanga o taua wa, ki te whakaketuketu i te ture e whakaaukati ana i te momi hikareti ki rō motoka me ngā tamariki. He ai ki ngā rangahau a te kāwanatanga ko te iwa tekau paihēneti o ngā iwi e kaha tautoko ana i tēnei ture. 

Ko tā minita takirua i ngā take hauora a Jenny Salesa, "Kaore mātou i te hiahia kia tuku i ngā pānui hapa maha ki te hapori. Ko te manako ia kia waiā haere ngā iwi i te take kia kaua e momi hikareti ki rō motoka. Nōreira ka aro atu ki ngā whānau me te whakatenatena kia noho auahi kore kia auahi kore hoki o rātou whānau arā ko ko ngā iwi ko rātou kei te kōtihi o ngā rangahau. Koira ko tētahi mahi ka āhei tātou te whakaora i ā tātou tamariki."

Anei te whakāro a te hapori, ko tētahi i mea mai, "He ture pai tēnei, ka kite i ēnei ra i te hunga houtu motoka me a rātou tamariki ki roto, kaore i te pai." Anei ko tētahi atu, "Ki ahau nei i te mea he iti noa iho te wāhi ki roto i te motoka ka titia tonu ki ngā tamariki ahakoa kei raro ngā matapihi ka haunga tonu ki ngā tamariki." Ka mutu, "Ko tētahi atu mea ka raru i ahau ko te wa ka momi hikareti ki roto i te motoka kātahi ka whiua te toinga ki runga i ngā tiriti, kaore au i te rata i tēra āhuatanga."