E īnoi atu ana te Kiingi Māori mō ngā tākoha hei āwhina i te motu o Tonga

E karanga ana te Kīngi Māori kia tuku koha ki a Tonga e noho pōkaikaha tonu ana mai i ngā pānga kino o Huripari Gita. Kātahi anō te tama o Kiingi Tuheitia Paki Te Ariki Tamaroa kua hoki mai i Tonga. Ināianei kua puare ngā tatau o Waahi Pa kia taea e te tangata te tuku koha ki ngā tāngata o Tonga.

Ko te whāngai me te manaaki i te iwi te tikanga tuku iho ki te Paa o Waahi.

“Koirā te whakahua ake i tēnei kaupapa o te Poukai nē, he āwhina i te pani, te pouaru me te rawakore,” i kī atu te māngai a Hone-Haunui Rapana.

“Nō reira waimarie mātou o te iwi nei o te iwi Māori me kī, kua whai wā mātou kia whoatu ki tētehi atu iwi taketake, kia mau ai ki ērā hononga mō te Moananui-a-Kiwa.”

I puta te īnoi mō te āwhina whai muri i te hokinga atu o Te Ariki Tamaroa mai i te motu o Tonga, me te kitenga atu o te iwikāinga e noho kāinga kore, e pōkaikaha ana.

“I kitea Te Ariki Tamaroa i te mamae kino i te ngau kino a ngā pēhitanga kei reira i a ia i te whenua o Tonga,” i kī atu a Rapana.

“Nō reira mō mātou o konei, mehemea he āwhina te mahi, ka mahi.”

Nō tērā marama i karawhiua te motu o Tonga e nga whiu o huripari Gita, te marangai kino ake kua pā ki tō rātou whenua i ngā tau whitu tekau. I puta te tono awhina ki ngā rauna Poukai.

“I īnoi atu te Kiingi me kī ki te tini me te mano o Aotearoa ake.”

“He aha ngā kai kua tukuna mai ki a mātou?"

"Ko te paraoa, ko te huka, ko ngā kēne whurutu, ngā kai e āhei ana te tiaki, te kai, āhua toru marama e muri i ngā wā kua tukuna atu.”

Ā tērā marama haere atu ai Te Ariki Tamaroa me tētehi ope rangatahi hei tākoha i ngā koha nei kia tuku āwhina ki te iwi o Tonga.

Hei te mutunga wiki mutu ai te wā tuku koha ki Waahi Paa. Wheoi, ā tērā wiki ka tūwhera ngā tatau o Te Wānanga o Aotearoa ki Manukau ki te whiwhi koha mō te kaupapa nei.