E noho ana ētahi kaitākaro Ōpango Māori ō-mua ki Hapani

Ko te rangi tuarua tēnei o te Kapa Ōpango Māori ki Tōkyo i mua i tā rātou tukinga tuarua ki Nīpono, ā, e whakaharatau ana te kapa i te karapu whutupōro o Suntory.

He māmā ake ngā whakaharatau a te Kapa Ōpango Māori i ngā rangi e rua kua hori nā reira i puta atu a Te Kāea ki tētahi karapu whutupōro, ki te karapu o Canon Eagles kia tūtaki atu ki ētahi kaitākaro Ōpango Māori tokorua ō-mua e tākaro ana i te whutupōro ki konei.

He oranga tokitoki  ki Hapana engari he Oranga tiketike ma ēnei kaitakaro whutuporo me o raua whānau.

E wha tau inaianei a Callum me tōna whānau e Noho ana ki Tokyo, a, hei te tau hou whānau mai ai tā raua pepi hou.

Kua mau i a Callum Bruce te reo, kua mau hoki ngā tikanga o te whenua hou nei, whai muri i tana tāmokotanga ki te karapu Canon Eagles i te tau rua mano tekau, i te otinga o ana mahi takaro mō ngā Highlanders me te tira Chiefs i te whakataetae Super 15.

E whai wāhi ana hoki tana hoa takaro Māori o mua a Karl Lowe ki te karapu nei, i tae mai ia i te Paengawhāwhā whai muri i te rima tau i te Kapa Hurricanes.

Ahakoa he poto noa te wā kua tau pai tōna whānau ki to rātou kainga hou.

Heoi e moke moke tonu ana te tokorua ki ētahi āhuatanga o Aotearoa.

Tūturu, mōu anō to kāinga e whakarite, a, ko Hapana tēra mo Callum raua ko Karl mo te wā e haere ake nei.