E rua ngā wāhine toa ka tohua ki te tohu o Rongomaraeroa

Ko te kaiako Rauponga, ko Noeline Taurua rāua ko te toa hoe kōpapa i te ao, ko Lisa Carrington i tohua ki te tohu matua o Rongomaraeroa i Ngā Tohu Tākaro Māori inapō.

Mō Carrington (Te Aitanga a Māhaki, Ngāti Porou), he tohu anō tēnei i tētahi tau kaha rawa ōna. E 30 tau te pakeke o te toa o te tohu tiketike o Halberg, nāna i toa ai ngā whiringa toa K1 500, 200 hoki i Szeged, Hungary i tēnei tau, me te mōhio anō, ko te wā tuawhitu karapīpiti whakamīharo rawa atu tēnā i toa i a ia te rēhi 200.

E rua hoki ngā mētara koura Orimipia i toa i a ia, ā ko tētahi anō ka whaia e ia ki Tōkyo ā tērā tau.

Kātahi rā te tino aranga ake i te ao hākinakina i ngā tau tata nei, ko tērā nā Taurua (Ngāpuhi) i amo ake i tāna ārahi i Ngā Rauponga ki te taumata toa o te ao, he kotahi tau i muri mai i tā rātou putanga atu i Ngā Taumahekeheke Hoawhenua me te kore mētara. 

I tū te ihu o Netball NZ ki a ia mō te tūranga kaiako, ahakoa koia te kaiako o te kapa kotahi o Aoteatoa kua eke ki te taumata toa o te ANZ Championship, arā ko te kapa Waikato-BOP Magic tērā i te tau 2012. Ā, koia hoki te kaiako o Sunshine Coast Lightning i eke ki te taumata toa o te Suncorp Super Netball Premiership i ngā tau karapīpiti e rua. I toa anō i a Taurua te tohu o Te Waitā mō te hākinakina i Ngā Tohu o Matariki i tēnei tau.

“It’s not until I actually come home that I feel the full effect or impact and you know it’s really humbling… but it’s so amazing for our sport,” tāna kōrero ki Te Ao i te Vodafone Events Centre inapō.

Hei āpiti atu, i whakapūmautia e Carrington te whakahirahiratanga o Ngā Tohu Tākaro Māori.

“I guess as I get older I understand more and more the importance of these awards, I guess what is hard is, you know, being in the spotlight a little bit. It’s always something that I don’t like to do a lot ,so I think what I love when I come here is seeing the other sports people and their supporters, that brings me a lot of pride.”

Kei te hoki mai a Taurua ki Aotearoa ki te whakaako tonu i Ngā Rauponga, ā e hāngai atu ana te aro o Carrington ki ngā Taumāhekeheke Orimipia.

“Training never stops and as soon as that January the 1st hits it's back in Auckland and training on Lake Pupuke,” tā Carrington.