E tau pai ana a Kīngi Tuheitia hakoa ngā kōrero hē o te mate manawa

E tau pai ana te noho o Kīngi Tūheitia i te hohipera o Waikato, e ai ki ngā kōrero i puta i tōna ringa atawhai, i a Tukoroirangi Morgan i te rangi nei.

E rere ana ngā karakia huri noa mōna whai muri i te hē o ngā kōrero i puta inanahi i mea ai, i pākia ia e te mate manawa.

“Kei te hē ngā kōrero kei te hē ngā kōrero kāre i hē te manawa o te Kīngi, ko te mate huka te tino mate kua roa e ngau ana i tōnā tinana mai noa, mai noa koira te tino mate.”

Koinei tā te ringa ātawhai a te Kīngi Māori, a Tukoroirangi Morgan, me tāna, e mihi nui nei ki te motu whānui e whai whakaaro ana ki a Kīngi Tuheitia.

Hei tā Tukoroirangi Morgan,“Kaua e māharahara kei te ora hāere te Kīngi, me te mea nei, koinei, ēnei āhuatanga me waiho ki ngā tino rata ki te hōhipera.”

Nō tērā wiki tonu ki tōnā Koroneihana, ka anga atu tana kauhau ki tana mate huka, me te kōrero ia, ko tērā tonu tētahi o ngā tino wero ōnā kei mua i tana aroaro.

Ko Kīngi Tuheitia tēra e mea ana, “E mōhio ana koutou e mate tonu ana ahau i ngā mate huka heoi anō kei te piki tonu te ora.”

He rua rā ki muri, ka tukia anōtia e ia taua mate rā.

E ai ki a Morgan, “Na runga anō i te māuiuitanga i haria tika atu ki te hōhipera o Waikato nō reira kei reira i tēnei wā.”

Mō te wā nei ka noho tonu a Kīngi Tuheitia ki te hohipere o Waikato, ki reira, whakamātauhia a ia e ngā mātanga hauora i a ia, me te whakatau ia, ka kotahi wiki rā anō tana noho i kō.

Hei āpōpō te whakatau, ka huihui tana kaunihera Tekaumārua ki te whakatau ia, ko wai rā ka kawe i ngā mahi a te Kīngi Māori.