E tautoko ana a Kelvin Davis i tētahi hīkoi e whakahē ana ki te mahi pāwhera

E takatū ana te mema pāremata mō Te Tai Tokerau a Kelvin Davis kia hīkoi mai ā runga ki ā raro o tōnā rohe-pōti ki te kawe i tāna whakahē ki te mahi pāwhera.

E ai ki a Davis, he iwa tekau mā rima o ngā kēhi pāwhera kāore i te whakaōkawatia, nāreira tana āki nui, kia whai wāhi mai te tangata te iwi ki tana kaupapa e kīia nei ko "Massive: Men Against Sexual Violence".

Kotahi te kahu mā ngā mema pāremata o ngā rōpū torangapū katoa, ā, ka kotahi te hīkoi ki te whakahē i te mahi pāwhera.

Hei tā Davis, "He hīkoi hei whakamōhiotia i ngā hapori katoa ehara tēnei he kaupapa mā ngai tātou te Māori anahe engari mō ngā iwi katoa ahakoa hainamana nō Te Moananui a Kiwa rānei, Pākeha mā, Māori mā mō ngā hapori katoa."

Tā ngā mema pāremata nei he whakarite mō te hīkoi roa o Massive.  Me te karanga nui a Kelvin Davis, kia aro mai ngā tāne.

E ai ki a Davis, "Mai rā anō ngā wāhine e kawe ana e wahangia ana i tēnei kaupapa ko rātou anahe engari inaianei kua tae te wā mō ngai tātou ngā tāne kia kawe tēnei kōrero kia mea atu ki o tātou ngā pāpa ngā iramutu hoa rānei kia haukotihia tēnei mahi."

Tā Davis, horekau i nui ake ngā pūtea tautoko mā ngā ratonga tūkino pāwhera, ā, ko ngā pūtea ka whakawhiwhia ki tēnei kaupapa hei tautoko i tērā.

"I whakaturia mātou he whārangi ipurangi ki runga i a Give a Little tō mātou hiahia kia tautokongia ā pūtea ki tētahi rōpū ki roto i Te Taitokerau e mahi ana ki roto i tēnei whiira, arā he korowai tumanako i te mea nā te ruarua o ngā pūtea tā mātou hiahia kia pakari tō rātou."

Hei tēnei Rāmere ka tīmata te hīkoi roa o Massive mai i Te Wao Nui a Tiriwa, ā, takahia rā anō ki Te Rerenga Wairua.