E tautoko ana a Ngāti Whātua i te hūnukutanga o te Wāpu o Tāmaki ki te raki

Ko te mahere, $10.3 piriona te wāriu, hei hūnuku i te Wāpu o Tāmaki ki Northport pātata atu ki Whangarei kei te tohea, ko ngā take mahi, take ōhanga me ngā pānga ki te taiao ngā kaupapa. E tautoko ana te iwi o Ngāti Whātua Ōrākei i te tono, ka mutu, kua tīmata kē tā rātau whakarite rautaki mō te wāhi o Tōangaroa i te puku o te tāone matua.

Mehemea ka nukuhia ngā mahi o te wāpu o Tāmaki Makaurau ki Whangārei, kei te hiahia a Ngāti Whātua ki Ōrākei kia whakahokia te whenua ki a rātou.

Hei tā Ngarimu Blair o Ngāti Whātua Ōrākei Whai Rawa Ltd:

“Ia tekau tau, ka hoko atu te wāpu a Ports of Auckland, moana hoki ki iwi kē. Ko tēnei te kī a Ngāti Whātua, mēnā e hiahia ana te pākeha, te kaunihera, te koromatua, ngā apiha i te wāpu nei, e hiahia ana rātou ki te hoko atu tēnei whenua, tēnei maunga, anei a Ngāti Whātua ki te hoko.”

Ko Ngāti Whātua kei rahaki o te tēpū kōrero mō te te wāpu, engari kei te tautoko kia nukuhia atu, ka mutu ki te pērā, ko tā rātou hiahia he whakawhanake i te tahatai, kia pai ake ai tā rātou toronga atu ki Te Waitematā.

Hei tā Blair, “Ko te whāinga nui kia hono anō ngā hapori, ngā uri ki te moana anō. I tēnei wā, ko te nuinga o tēnei takiwā, he taiepa. Kore e taea ki te pā atu ki te ruku ki te wai.”

Kei te hiahia hoki a Ngāti Whātua kia whai wāhi atu ētahi kaiwhakangao o te rohe ki tāna mahere hoko.

“Kei konei mātou ngā uri a Tuperiri ki te hoko, me ō mātou hoa. Mōhio ana a Ngāti Whātua, he nui te utu mō tēnei whenua, nō reira kua tuwhera te kuaha ki iwi kē ki te noho tahi ki a mātou, me pēhea tātou e hoko."

Tērā pea kei te ingoa Māori o te wāhi te whakapūmautanga o tā rātou mahere. 

“Ko te ingoa tawhito o tēnei wāhi, ko te Tōangaroa, e ahu mai ana i te mahi tō waka. Ko te whakaaro nui ia, mā te mahi tahi i raro i te whakaaro kotahi, ka kaha ake ai ngā iwi o Tāmaki Makaurau ki tua.”

"Kua whakatakoto a Ngāti Whātua he mahere, kua kohikohi ngā pūrākau, ngā kōrero o tēnā whānau, o tēnā whānau. Kia hanga wāhi anō kia ruku ki te moana, kia hanga whare takitini, hanga whare pupuri taonga. He whare e whakaatu ana te ao Māori, ērā atu mea."