E tautoko ana te Kaunihera Māori o Reipa i a Nanaia Mahuta i te rēhi kaiārahi mo te Pāti

Kua tautoko te Kaunihera Māori o te Rōpū Reipa kia noho a Nanaia Māhuta hei kaiārahi o Reipa.

Ka timata te rēhi hei te wiki e tū mai nei, engari nonanahi nei ka tae atu ngā kaitono ki te Pā o Rātana.

I tae tōmuri mai ia ki te rēhi kaiārahi, engari he timatanga pai mā Nanaia Mahuta e whakataetae ana mo te tūnga tumuaki mo Rēipa.

E ai ki a Daniel Phillips o te Kaunihera Māori, “Kua whakaae katoa te Kaunihera ki te tautoko i a Nanaia Mahuta i a ia e whai ana i te tūranga hei kaiārahi mo te Pāti.”

No te tau kotahi mano e iwa rau, iwa tekau mā ono a Mahuta e noho ana hei mema tōrangapu, ā he ohorere tōna putanga ki te rēhi nei, engari kei te tino tautoko te Heamana o te Kaunihera Māori i ōna pukenga.

Ko tā Phillips, “ko Nanaia te kaiārahi tika, ka tāea te whakakotahi i a Reipa.”

Engari ehara pea ngā mema torāngapu Māori o Reipa e whakaae. I whakaingoatia e Rino Tirikatene a Grant Robertson ki te rēhi, ā,  ahakoa he mema ia o te rōpū taki Māori, kei ia mema tōna ake mana.

Ehara i te kōrero ohorere, e hiahia ana ētahi Māori o te rōpu ki te whakakaha ake  tā rātou mana, engari ahakoa ngā mahi angitū i ngā tūru Māori, ehara tēna i te kī taurangi, ka whai mana rātou mena ka tohua rāua hei kaiārahi.

Hei te Wenerei e tu mai nei, ka tū te hui tuatahi o te rēhi ki Te Whanganui a Tara.