E tautoko ana te Māreikura o Rarotonga i te kaupapa o Takitimu Ora

E kaha ana te tautoko a Te Kāhui Ariki Kuki Airani i te kaupapa Tākitimu Ora i whakarewaina ki Pā Harakeke i tēnei rā. Ko te whāinga nui o te kaupapa, ko te whakamana i ngā rangatahi ki te whai mahi.  Ā, ko tā te kuini o Rarotonga, kei pōhēhē mā te Māori o Aotearoa anake tēnei kaupapa, engari mā tōna ake iwi anō hoki.

Hei tā kuini o Rarotonga, Pa Ariki, ki te tae ā-tīnana atu ia ki tērā kaupapa, ka whai hoki ko āna uri Māori.

E ono ngā rōpū Māori e mahi ngātahi ana i Takitimu Ora ki te whakatenatena i ngā rangatahi kia whakarangatira ake i a rātou anō.

Hei tā Des Ratima, “I ngā tau o mua, ka haere ake nei rātou katoa, ngā service providers, ngā bureaucrats, hōmai ki a mātou tā rātou nei whakaaro, i tēnei wā, kei a mātou te whakaaro, kei a mātou te mahi nei.”

Hei tāna, "Mō mātou te hapori, mō mātou te whānau e awhi atu, awhi mai ki ngā huarahi katoa ki tō rātou hīkoitanga ki te rangatiratanga."

He kōrero e tautokohia ana e Pā Ariki, he rua tekau mā rima paiheneti o te hunga o Te Matau a Māui he Pasifika.

Nā reira, me whakatūwhera ngā kuaha pakihi ki a rātou, kia kaua ai ngā tūranga mahi motuhake e riro ki ngā tāngata nō tāwāhi i ngā kamupene pēnā i a Unison.

Ko te whāinga kia heke te nama o ngā taiohi tekau mā rima ki te tekau mā iwa ngā tau, kāore i te whai mahi, mātauranga rānei mā te rua tekau paiheneti.