E whakarite ana ngā Kiwi Ferns mō te pakanga nui

Ua mai, whiti mai rānei ka whakaharatau kaha te kapa Kiwi Ferns.

Whai muri i ngā wikitōria ki runga ake i te kapa Jillaroos i te whakataetae Four Nations me te whakataetae NRL Nines, e tū maia ana te kapa.

Hei tā te poumua tuarua a Hilda Peters, kāhore ia i te awangawanga i te kapa Jillaroos, ko te mea nui mō rātou kia tutuki i ā rātou ake mahi ki runga i te papatākaro.

Kei te pērā hoki te whakapono a te kāpene hou a Laura Mariu i tana kapa, hei tana, ahakoa he poto te wā hei whakarite mō tēnei tukinga, he wairua hikaka i roto i te kapa me tana whakapono ka eke rātou ki runga.

Kua tekau mā rima tau te kapene hou nei e tākaro ana i te kapa, e wha ngā ipu o te ao kua tutuki i a ia, nā whai anō tana koa ki te ārahi i te kapa.  Ko tāna, he mea miharo ki te tākaro mō Aotearoa, he mea miharo ake kia ārahi i te kapa.

Hei te Rāmere ka whai wāhi anō te kapa Kiwi Ferns kia tākaro tōmua i te whakamātatau Anzac kia kitea anō te ao i ngā pūkenga o ngā wāhine ki runga i te papatākaro.

E mea ana a Peters, ko te nuinga o te wā, ko te whakaaro o ētahi, he kemu tēnei mō ngā tane anake engari kua huri te whakaaro ināianei.

Hei te ahiahi āpōpō rere atu ai ēnei wāhine ki Piripane, oti ai ngā whakaritenga mō te tukinga ki reira.