Former colleagues pay tribute to veteran broadcaster Whai Ngata

Kua hinga te totara haemata o te ao pāpāho, ko Tanara Whairiri ki Tawhiti Ngata tērā ka mate nei, e whitu tekau mā whā ōna tau. Nō ngā kāwai heke rangatira o Ngāti Porou me Te Whānau a Apanui, ā, inapō rā ia ka riro i ana māuiuitanga. I te rā nei, he kōrero mō tana hūmārie me tana whakatoi hoki te mahi ā ētahi o ōnā hoa mahi o mua.

I a Whai Ngata e mahi ana hei Kaihautu Pouaka Whakaata, ka whai wāhi mai ia ki tēnei rūma i Te Reo Tātāki.

Hei tā tōna hoa mahi o mua tā Tini Molyneux, hakoa i te mauiui a Ngata, i puta tonu tona wairua whakakata.

Ko tā Tini Molyneux – Kaihautū o Marae, "Tana āhuatanga ki te wero i te tangata ki te whakatoi, me tana kii mai kei te tino pai a ia, engari me ta mātou mōhio anō,  kare ia i te pai... Heoi anō mō matou pea ehara i te āhua ohorere, nā te mea kua kōrero kehia mai ia ki a mātou koinei te mutunga atu, te otinga atu mona."

Ka mate a Ngata inapō i ngā āhuatanga e pā kau ake ana ki tōnā manawa me ōnā pēke hau. Nānā anō i para te huarahi mō te hunga Pāpāho Māori ki runga i ngā ara pāpāho auraki engari hei tā tētahi o ōnā hoa mahi o mua tā Derek Fox, ko tētāhi o ngā mahi nui i oti nei i a Ngata, ko te whakaoti i te papakupu a tōnā pāpā.

Ko tā Derek Fox, Kaipāpāho o mua , "Te pukapuka hei whakamāori, hei whakapākeha i te reo māori i tīmatahia e tōnā pāpā, a Hori Mahue, ā, nānā i whakaoti. Tērā pea te tino mahi i oti i a ia, ae, tika tonu ngā mahi o te pouaka whakaata engari i te rereke wena i tera wa."

Ko Ngata tētahi o ngā kaiwhakahaere matua mō te Tari Māori, Moananui a Kiwa o mua a Te Reo Tataki. Ka ritaia ia i te tau rua mano ma waru, engari hei tā Molynuex ko te mea pā pōuri pea, ko te whakakorenga o te wāhanga rā i te tau 2014.

“Koia tetahi o ngā tino tāngata i whawhai kia kaua e wehewehetia te tari Māori me te MoananuiaKiwa. Ko tana titiro, me noho tonu wena kaupapa i raro i te maru kotahi, i raro i te maru o te reo tataki nā te mea koinei te wahi tika kia whakaputa atu aua kaupapa ki te ao,” tā Molyneux.

Ka hoki atu te taonga o mate ki tōna iwi o Ngāti Porou a te ata, kia tangihia, kia mihia rā ki te marae o Hiruharama i Ruatoria.

Kua mahue ki muri nei ko tōna hoa rangatira a Geraldine, ā rāua tamariki tokotoru me ā rāua mokopuna maha.