He āwangawanga tā Georgina Beyer mō Ipurangi-MANA

E rere ana te matakawa o Georgina Beyer, kaitono o MANA i te Tai Tonga, ki te āhua o te mahi ngātahi a Internet-MANA.  E ai ki a ia, kua rerekē ake te ia o ngā kaupapa here a MANA, Heoi, hei tā Annette Sykes, kaitono o MANA i Te Waiariki, kāre ngā kaiārahi i te whakaaro pērā.

I tīmata te whanaungatanga o Ipurangi-MANA i roto i te ao pāpāho, engari e ai ki tētahi o ngā kaitono a MANA he huakore te noho ngātahi.

Hei tā Georgina Beyer, “Kua rerekē rā te kaupapa o MANA, he kaupapa here anō rā wā Ipurangi, e taupatupatu nei i wā mātou.”

E ai ki te kaitono hou o MANA ki Te Tai Tonga tērā ngā āwangawanga kei te rere mō te Rōpū Ipurangi.

Ko Georgina Beyer tēra e mea ana, “Kim Dotcom tāku e māharahara nei, he noho atu ia ki te pae o muri, tukuna ngā kaitōrangapū ki ā rātou mahi.”

Heoi e ai ki te kaitono o MANA ki te Waiariki a Annette Sykes, he rerekē ngā whakaaro o ngā kaiārahi.

Hei tā Annette Sykes, “He whakaaro tōna mō āna kaupapa, engari he rerekē tērā ki wētahi o ngā kaiarahi o MANA.  Ahakoa tērā kei te tū tonu te whanaungatanga i te Ipurangi nei me tātou o MANA.”

Ko tā Georgina kei te kaha pēhi te Rōpū Ipurangi i a MANA me a rātou kaupapa here.

E ai ki a Annette Skykes kāore ngā whakaaro tuatahi a MANA i te rerekē. “Kao, kāore he rerekē, ko te mea nui kia kaha ai tātou kia tū pakari ai kia pakanga atu mo ngā kaupapa ki tēnei o ngā tino iwi te pani me te rawakore.”

Kei te haere tonu ngā mahi whakararata a Beyer mō te turu o Te Tai Tonga, kei mua a Rino Tirikatene i ngā tatau kaute a Whakaata Māori he toru tekau mā tahi ōrau.  Ā, te āhua nei e hia kē nei ngā wero kei mua i a ia.