He āwhina i ngā whānau pōhara mō te wā o te Kirihimete te mahi a te Mīhana o Tāmaki

Auckland City Mission Xmas lunch caters for 2000

Ko te whakanui i te wā o te Kirihimete, te tuku koha, te kai me te noho tahi me ngā hoa, whanaunga hoki, te mea nui ki ētahi. 

Heoi, tē taea e te katoa te tutuki i taua āhuatanga.

Ko tā te Mīhana o Tāmaki mahi i tēnei tau, ko te whakakoakoa me te āwhina i aua hunga.

Ko ngā whāinga a te Mīhana i tēnei tau, ko te whakarite:

  • e 3,000 ngā pāhara ohorere kia āhei ngā whānau ki te whakanui i te wā o te Kirihimete
  • e 7,000 ngā koha mō ngā tamariki o Tāmaki kua kore rawa e whiwhi taonga
  • kia manaakitia ngā tāngata 2,000 ki tō rātou hākari nui
  • e 2,945 ngā koha mō ngā ohu ā-hapori ki te tohatoha ki ngā whānau o aua ratonga

E ai ki a Diane Robertson o te Mīhana o Tāmaki, "Koinei ngā āhuatanga o te wā o te Kirihimete ki te Mīhana, ā, koinei ngā mea e kikini nei i ō mātou manawa."

E ngana tonu ana te Mīhana ki te tiaki i ngā whānau e pōkaikaha nei i ngā taumahatanga o te wā.

"Ko te atawhai, te maumahara i ō tātou whānau me te tautoko i ētahi atu, koirā te Kirihimete," e ai ki a Robertson.

I tērā tau i tutuki katoa ngā whāinga a te Mīhana.

Ki te hiahia tuku pūtea ki te Mīhana mō te Kirihimete, whakapā mai ki konei.