He hīkoi mō te hunga kāenga kore

Te Kuru o te Marama Dewes

Nō te matenga atu o te kākoke tuarua i ngā huarahi o Tāmaki Makaurau ki te Tonga, kei te auē te hapori kia whai rongoā mō te hunga kāenga kore.

Ko tā Rangi McClean, mema Kaunihera ki Manurewa, "Tā mātau kī, kia kore anō e mate ai he tāngata e noho kāenga kore ana, e noho pōhara ana."

Hei tā Shane Taurima, Kaitono mō te Paati Māori ki Tāmaki Makaurau, "He īnoi ki ngā kaipakihi ki te hapori whānui, homai he whare hei whakaruruhau hei wharau hei whare mō te hunga kāenga kore."

Nā ngā rōpū o te hapori i whakarite hei waha i ngā auē o te hunga kāenga kore. Hei tā Shane Taurima ko te ngako kia oho ake te katoa ki tēnei take.

"He whakatairanga i tēnei mate weriweri kei waenganui i a tātau ki te motu i runga i te whakaaro kāore te katoa te motu i te mōhio he pēnei rawa te nui te kino rānei o tēnei mate nui te kore kāenga i waenganui i a tātau."
 

I ngā wiki kua taha ake, tokorua ngā kāenga kore kua mate i ngā huarahi o Manurewa. Kei te wero a Rangi McClean i te Kaunihera o Tāmaki Makaurau me te Kāwangatanga kia hāpai atu.

"He aha tā kōtou hei ārai atu kia mate he tangata i runga te huarahi? He aha tā kōtou e awhi nei i tēnei o ngā momo kaupapa o a tātau whānau e noho kāenga kore ana?"


Hei tā Rangi anō he take tēnei kia kōkiritia e ngā kaitōrangapū i tēnei tau pooti.