He hononga kei waenganui i ngā huarere kino ki te huringa o te āhuarangi

Te Kuru o te Marama Dewes

Kātahi te raumati wera rawa atu ki Aotearoa nei, heoi ko tā NIWA, hei ngā tau e taka mai ana ka kaha ake ngā huarere.

Ko tā te ripoata a NIWA, nā te mahana o te tai, me te kaha pupuhi nei o te hau raro, ka mutu, ko te huringa o te āhua o ngā rangi te take kua kaha ake ngā huarere ki Aotearoa nei.

Hei tā NIWA he mahana ake te ao ināianei, arā rā, ko te pīhau waro tōna pūtake. Heoti koia ko tā NIWA e mea ana, he hononga kei waenganui i ngā huarere ki te huringa o te āhuarangi.

Ahakoa te wera, ko te marangai tērā e kaha whakararu ana i ngā whakahaeretanga, arā, Kua kite ake tātau i ngā huarere e horapa haere ana i te motu arā ko huripapa Fehi rāua ko Kita wērā. Kua heke te marangai ki ngā rohe puta noa arā kua horo ngā papa, kua waipuke ngā huarahi, ngā awa, ngā tai, ngā whenua anō hoki. He kura, he taunga rererangi kua katia, āpiti atu he tāngata kua whakawāteatia i ngā wāhi mōrearea.

Hei tā NIWA kāre e pēnei rawa te wera ia wiki, ia raumati rānei, engari i ngā tau e taka mai ana ka maha ake, ka kaha ake ngā huarere nei i tēnei ao e mahana haere nei, otirā, ki te puta pēnei tonu ai te pīhau waro.