He hui whakanui i ngā kuia kua whakawhiwhia ki te tohu paetahi Mātauranga Māori i Panguru

He pātaka whakairinga kōrero kua whiwhi ki te tohu mātauranga a te Pākehā.

Tokoono ngā pakeke o te hapori o Panguru i whakawhiwhia ki ō rātou tohu paetahi nā Te Whare Wānanga o Awanuiārangi, ki mua i te aroaro o tō rātou iwi i te rangi nei.  

He ekenga nui whakaharahara mō ngā mātāpuputu nā rātou i whakaatu atu, kia pēperekou ana, ehara i te mea me pū noa ko te ruha.

Ehara i te āhuatanga e kitea ana ia rā, ko ngā kaumātua e whakakākahutia ana ki te korowai o te mātauranga.

Tūturu he maha ngā akoranga hōu mō ēnei tauira i hoki nei ki te kura wānanga.

Ū tonu ana ki tōna īngoa, Hokianga Whakapau Karakia, ko te hīkoi pōtaetanga mō ēnei tauira he hīkoi ki te whare karakia tonu.  He wā e hoki mahara ai ki o rātou hoa tauira i mate i a rātou e takahi ana i tēnei ara.   

Kāti, ko ngā mokopuna i whai wāhi nui ki tēnei kaupapa, e tū tauira nei ngā pakeke mō te reanga e ara mai ana.

Nō reira kua mau i ēnei manu kai i te mātauranga a rātou tiwhikete.  Ko tā rātou ināianei he kai i tēnei keke o whakanui.