He hurahura i te reo ake o Ngāti Porou

Te Kuru o te Marama Dewes

He whakaaturanga ā-ipurangi hou nā Te Reo Irirangi o Ngāti Porou, arā, ko "He Aha Tō Say", e whakakao ana i ngā kaikōrero taketake o Ngāti Porou hei rauemi whakarauora reo mō te iwi.

Ko tā Mihi Keita Ngāta, “Taaaputapu. Koira tētahi o ngā tino kupu. waenganui ō mātau o Ngāti Porou. Taputapu.”

Nā Tā Apirana Ngata te waiata e mea ana, "He Wiwi, He Nāti, He Whanokē", koia hoki ko te reo ake o te wiwi Naati.

“Ko te reo katoa o te tinana, ngā whatu, te rūrū haere o ngā mahunga, ngā ringa, te tinana katoa, nā tāpiri atu tēnā reo ki te reo kei te puta mai i ngā waha, ka mau te wehi”, te kī a Mihi Keita Ngata.

Hei tā te kaiwhakahaere o Radio Ngāti Porou hei tā Erana Keelan-Reedy, “Mōhio tonu ahau maha hoki ngā tāngata i roto ō Ngāti Porou he reo taketake tonu, kāre i te rongohia ia rangi, kāre i te rongohia i runga i ngā iere i te reo irirangi, i runga anō i te pouaka whakaata.”

Ko te hiahia a Erana Keelan-Reedy kia whakamahia hei rauemi ki rō kura.

“Kia rongo anō hoki i te reo o Ngāti Porou te reo o ngā Pakeke i tipu i roto i te reo, kia kore aua kupu aua kōrero aua rerenga kōrero e ngaro”, te kī a Keelan-Reedy.

Hei tā kōkā Ramari Nepia kei te ngaro haere te reo ake o Ngāti Porou.

“He reo hou kei te hou mai ki roto i a Ngāti Porou, aua atu, kei te pai tēnā, ko te mea nui ki auwa kia puta te reo Māori, engari ko te hao kia puta tonu ko te reo o Ngāti Porou”, te kī a Ramari Nepia.

Ka whakairia ngā whakaaturanga ki te whārangi o Radio Ngāti Porou.