He iwi e mahitahi ana ki te Kaunihera ki te whakamahi i te Whenua Māori

Piripi Taylor

He whenua Māori kei te āta tirohia mō tētahi whakawhanaketanga nui i Te Moana-a-Toi. 

Tōna tekau heketea whakaterāwhiti i te arahanga o Whakatāne e hiahiatia ana ki te whakatū tauranga waka hōu, motuhake nei te hanga, he kaupapa matua i roto i ngā mahi hanganga o te rohe e whakawhānui ake ai ngā hua ōhanga, i ngā mahi moana, i ngā mahi tāpoi anō hoki. 

Ko te waitohutanga o tētahi whakaaetanga nui ki waenga i te rōpū Kai-tiaki Ahu Whenua o Rangitāiki 28B No 22, rātou ko Te Rūnanga o Ngāti Awa, ko Ngāti Awa Group Holdings, ko Te Kaunihera ā-rohe o Whakatāne hoki i tutuki i tēnei wiki, ka whakamana i tā rātou tūhonotanga ki te kimi ara i te kāwanatanga e whai oranga ai te taha ahurea, hapori, ōhanga, taiao anō hoki i raro i te kaupapa hanganga hōu o Whakatāne. 

I tētahi pānui i tēnei wiki, nā te Koromatua o Whakatāne Rohe, nā Tony Bonne te kōrero, i whakatauria, ko Rangitāiki 28B te wāhi e hiahiatia ana whai muri i tētahi tirohanga hōmiromiro nui.

“He tukanga nui i whakahaeretia i ngā wāhi maha mō tētahi taunga waka i whiriwhiria e ngā hoa mahi a Te Kaunihera ā-rohe o Whakatāne, e Te Rūnanga o Ngāti Awa, tae atu ki ngā mātanga ahumahi, rōpu whai pānga anō hoki,” hei tāna.

“Tēnei wāhi e tirohia ana, he nui ngā take e tino hiahiatia ana ia, ko ngā utu, ko ngā whakahaerenga mō ngā waka, ko te āhei ki te whakawhānui, ki te whakamahi i te wāhi, te aheinga ki te wāhi, ko te iti o ngā pānga kino ki te taiao, ā ko te whakanui hoki i te hiranga o te awa ki a Ngāti Awa. 

“Ko tētahi aronga o te kaupapa tono pūtea i te Kāwanatanga, ko te whakapūmau, te whakapai ake hoki i ngā ara e whai hua ai ngā whenua Māori hei tauwhiro i ngā whāinga ōhanga,” hei tāna. “E pono ana au, ko te mutunga kē mai tēnei o te ara whakawhanake i roto i ngā rau tau maha, e hihiko nei i te ngākau, ā mā tēnei kaupapa, ka taea te eke ki ngā taumata e whai hua nui ai te rohe katoa.”

E ai ki te heamana o Rangitāiki 28B No 22 Trust, ki a Brian Simpson, ki te tutuki, he kaupapa ka tino panoni i te ara ki tua o te tarahiti, i tana āhei hoki ki te tautoko i ngā kai-pupuri hea. 

“Ko tōna rite, he whenua Māori iti nei, ā he nui ngā kai-pupuri hea, nā ko te whakamahi i a ia kia āhua pai tonu āna hua, he uaua rawa atu. Ko te matapae ia, he ara tēnei e tino āhei ai mātou ki te kimi painga e mauroa ai ngā momo hua katoa, hei painga, hei oranga mā te katoa. 

“Te kaupapa nei, he nui ake i te mahi moni ki a mātou,” te kī a Simpson. “E mau ana te titiro ki te ara e wātea ana, kia whai wāhi nui atu ai tā mātou tarahiti ki te rāngai moana, rāngai tāpoi anō hoki i Whakatāne me āna huarahi e whai mahi ai ā tātou rangatahi i ēnā tū mahi.”