He kaupapa kāmura kua whakritea mo ētahi tauira Māori - Kaupapa Motuhake

He kawenata kua waihangatia i waenga i te iwi o Ngāti Haua, te Kuratini o Waikato, me te kamupene hanga whare o Stanley Group, kia mahitahi i roto i ngā wiki tekau ma whitu, ki te whakaako i etahi tauira ki ngā āhuatanga o te mahi kāmura, kia whiwhi tohu NZQA taumata tuawhā, kia whiwhi mahi, hei te otinga. 

Hei tā Mokoro Gillett, "Ko te tuatahi ake me mihi ka tika kia rātou, te take i huakina te tatau, me kī he piriti mai ngā iwi ki te uru ki roto i to rātou Kamupene, no reira me mihi ka tika kia rātou me to rātou whakāro mō ngā tauira."

No tēnei wiki powhiritia ai ngā tauira nei ki te wharemahi a Stanley kei Matamata, ā no Ngāti Tuwharetoa te waimarie ki te taki i ngā karakia whakatuwheratanga, i te wāhi ako hou, e noho ai a rātou rangatahi, mō te roanga o te wā e akonatia ai rātou.

Ko tēnei hononga i waenga i te Stanley Group, te Iwi o Ngāti Haua me te Kuratini o Waikato, he tuatahitanga mō rātou me te aha kua kitea te wairua Māori te whakāro Māori kua puea ake i roto i ngā rangatahi nei.

Hei tā Rion Kahia, "Tino miharo mō matou ngā tama me te kohine ra, engari ehara mō matou anake ngā painga, engari mō te hunga kei te whai mai i muri ia matou."

Na reira mō te katoa o te wa e ako ana ngā tauira nei, kei reira ngā tautoko a ngā whānau, me ngā iwi, ngā mangai mō Te Kuratini ano, e kipa kipa ana e wero ana ia rātou, e hapai ana ia rātou kia eke ki ngā taumata, kia whaia te tutukitanga o a rātou nei moemoea.