He moni taunaki i te ōhanga o Te Tairāwhiti

Te Kuru o te Marama Dewes

E whakangao ana Te Tahua Whakawhanake i ngā Rohe Taiwhenua i ētahi kaupapa hei whakatipu i te ao ōhanga i Te Tairāwhiti. Koinā te whakapuakanga a te Minita Whanaketanga Ōhanga a Rohe, a Shane Jones i te rangi nei.

“He aha oti te patanga ki te whakawhiwhia ngā moni mō te whakarahi pūtea anakenake, pai kē atu me whakarahi i te pukenga kei ngā kaimahi, kei te rangatahi kei ia whānau kia taea ai rātau te kī atu ki wā rātau tamariki noho mai ki Te Tairāwhiti.”

Rua tekau miriona tāra ka whakawhiwhia ki te Taratī ā Hapori o Eastland mō tētahi whare whakamahi rākau.

“Tōna tikanga kia poapoa atu ki ngā kamupene kia haramai ai ki konei whakatū pākihi ai tā te mea he pātū rākau e hia rānei te miriona e tuputupu tonu ana ki te Tairāwhiti korekau ana e pai ana kia kite i te rahinga e ngaro ana ki rāwāhi.”

Ka tū te wāhi whare nei hei wāhi e whakaritea ai ngā rākau, ka mutu e matapaetia ana e toru tekau ngā tūranga mahi ka puta.

“Pai kē atu kia haria mai ki Tūranganui a Kiwa hanga mai hei papa hei whare hanga aha rānei nā me te tini o ngā mahi ka puta kia whiwhi kaimahi ai Te Tairāwhiti i raro tonu i te whakatūnga o ngā kaipakihi kia tū ai ngā ohanga nē.”

E rua miriona ka whakawhiwhia ki Te Taratī Hinonga Pāpori Aotearoa, kia hangaia mai tetahi wāhi whakarite kai, kia maha ake ngā turanga mo te hunga kore mahi ano hoki.

“Kei konei wētahi mahi e whiwhi huruhuru ai koe kei konei wētahi huarahi e taea te whakakoni atu i te pukenga i roto i a taitamatāne i a taitamawahine koia tāku e mea ake nei ka nui noa atu taku hari kia tū ai ngā kaupapa pērā.”

E ono mirion tāra hei whakatū i tētahi whare ine hinengaro, me te manako e rua tekau mā rima ngā tūranga mahi.

“Taku whakapae e kore tētahi tari pērā e taea te whakatū i roto i a Kaikohe me Kaitaia engari Tūranganui a Kiwa, haramai tētahi āhua.”

Hei āpōpō pānuitia ai ētahi atu tautoko ā-moni nei hei whakawhanake i te rohe.