He mōrehu hōia o te Ope Rua Tekau Mā Waru kua huri ki te īnoi moni hei oranga mōnā

He mōrehu hōia o te Ope Rua Tekau Mā Waru kua huri ki te inoi moni mai i ngā tāngata ki runga i te tiriti, whai muri i te poronga o tana penihana he kotahi marama ki muri.

He ika a-whiro o kamupene A a Selwyn Clarke, ā i poroa tana penihana nā tōna karo i te hāmene a te Kooti mo te noho tautohe ki runga whenua te take.

Kei te mākete o Kaitaia a Selwyn Clarke i tenei rā ki te inoi moni awhina i ngā tāngata hei oranga mōna.

Hei tā Selwyn, “Ano ki au te kāwantanga kua whai penihana au tae noa ki tōku matenga mutunga engari inaianei kua poroa hoki toku penihana, e rapu oranga ana ahau mōku ano.”

Koia tetahi o ngā hunga i hāmenengia e ngā pirihimana i to rātou noho porotū ki te taunga rererangi o Kaitaia i tērā tau, A, na tana kore whakaae kia haere ia ki te kooti kua puta te tono a ngā pirihimana kia hereherengia a ia nā reira ka poro tana penihana.

Hei tāna, “Nga iwi I mauherengia ia taua rā ko rātou hoki ngā tāngata e whai tika ana ki runga I taua whenua. Ehara tērā whenua no Ngai Takoto ehara tera whenua no te kāwanatanga.”

Ki tā Clara Heke-Herepete, “E tika ana ratou te poro tana penihana, kao ..kao e hoa.  He kaumatua hoki ia kahore e taea e ia te mahi i te wa nei.”

E mohio ana a Te Kāea kua tuhi reta ngā pirihimana ki te roia ōmua o Clarke e taea ai te muku i te tono herehere ki runga i a ia engari taka mai ki tenei rā kāhore ano ia ia rongo korero ia ratou.

Ki tā Selwyn, “I noho atu au i waho kē i te whare o WINZ I taua ra ka tae mai hoki ngā pirihimana ko tētahi o ngā pirihimana ko taku mokopuna.  Ka mea atu au.take your handcuffs and go and get lost I'm here on serious business. So, ka mutu mai ana i taua rā ka haere penei atu au a tērā wiki kua hoki au ki te whare o WINZ.”

E ai ki a Ngawaiata Evans, “Kaua e pera …ehara I te mea me aukati na tana kaha ki te tiaki tonu i te whenua ne.  Ahakoa kei konei e whawhai tonu ana matou.  Ehara I te mea kei wahi kee e whawhai ana.  Na kua hoki ora mai ia e whawhai tonu ana ..he tohu rangatira tera.”

Kua tuku patai a Te Kāea ki te Tari Hiranga Tangata e pā ana ki te penihana o te kaumatua nei a heoi ano e tāria ana mo te whakautu.

Ki tā Selwyn, “Ano ki au i toku hokinga mai i tāwahi i kite au ngā mea ngā beggars o Ihipa.  Ka mea atu au ki au ano, "Oh thank goodness I'm never goinna be like that". Kahore kē kua kaumatua au ko au tetahi o nga beggars i Aotearoa i toku nei whenua.”