He ngoikore ngā whāinga e toru tau kia whakaiti te pōharatanga tamariki - CPAG

E ai ki te rōpū Child Poverty Action, ko te pae tawhiti, e toru tau te roa, a te Pirimia ki te whakaiti iho i te tokomaha o ngā tamariki e noho rawakore ana i Aotearoa, he ngoikore. Ko ngā whainga i puta i te Minita Whakakore i te Pōharatanga a Ngā Tamariki, i a Jacinda Ardern inanahi, ā e ai ki a ia, e hia nei ngā tekau mano tamariki ka puta i te pōhara.

Kāore te māngai take hauora o CPAG i te rata ki ngā whāinga hōu e toru tau mō te pire.

Ko tā te pire ko te hunga e whiwhi moni ana kei te haurua o te tau waenga, he rawakore. Ko te mea ohorere, ko te nuinga o ngēnei tamariki he Māori. E ai ki te Pirimia ka tutuki ngā whāinga i ngā hiahia o ngā tamariki e noho pōkai kaha ana.

Ka ea te kāwanatanga i ngā whāinga i tāna Putea Tautoko i ngā Whānau, arā e whitu tekau mā rima tāra ka tuku ki ngā whānau e toru rau waru tekau mā whā mano hei te rā tuatahi o Hurae tīmata ai. Engari, ko tā CPAG, me whānui ake te tuku pūtea.

Ka kapi te wā whakahoki kōrero mō te pire hei te pōutūtanga o te pō, hei te tuawhā o Paengawhāwhā.

Anei ngā whāinga e toru tau i raro i te pire:

Ko te aronga tuatahi ki ngā tamariki e noho ana ki roto i te tino pōharatanga. O nga tamariki kotahi rau e ono tekau mano e noho ana ki tenei reanga, ko te manako ka whai painga ngā tamariki e whitu tekau mano.

Tuarua ka aro ki ngā whānau e raru tonu ana āmuri i te whakaeatanga o nga nama-ā-noho. Tōna rua rau tekau mano ngā tamariki ka taka ki tēnei tūāhua. Ko te whāinga kia puta ngā tamariki e whā tekau mano i te pōharatanga.

Tuatoru kia whai wāhi ngā tamariki e toru tekau mano ki te kai tika e toru ngā wā o te wiki, kia mau kākahu mahana, kia wahi waahi atu ki te tākuta hoki.