He nui ngā tūmanako a ngā kaipōti o Te Tai Tonga me Te Tai Hauāuru mā ngā kaitono - Pūrongo Motuhake

E pōkaikaha ana ētahi Māori kei Ōtautahi ki te whai whakaruruhau, koia te motuhenga o tō rātou ao.

Ko Rakiura ki te tonga, ko Te Whanganui a Tara ki te raki, ko Te Tai Tonga te rohe Māori nui rawa atu o te motu.  E ai ki ngā pōti Reid Research a Whakaata Māori i puta i te wiki nei, ko te mema tōrangapū o naianei, a Rino Tirikatene, kua puta whakaihuwaka.

Hei tā David Jones, “Tuatahi ko te ingoa whānau, tuarua kua noho mai ia i roto i te takiwa mō ngā hei mema pāremata mō ngā tau e toru kua pahure, nā reira kua whai wāhi ia ki te tūtaki ki tērā whānau, ki tērā whānau atu i tēnā ko ngā kaitōrangapū o ētahi atu pāti kātahi anō kua āta whakamōhio atu ki a rātou ki te hunga kaipōti heoi nā te iti o te wā tērā pea he iti atu ngā pōti ki a rātou.”

E ai ki tētahi autaua tōrangapū, a David Jones, he mahi nui kei mua i te aroaro mō te rōpū Reipa, engāri kua whai tautoko rātou i muri mai i te tara Dirty Politics i kite i ngā wiki nei.

Ki te Tai Hauāuru, ka tāea rānei e te ringakaha o te hāhi Rātana te tanuku i te whare kua roa e nōhia ana e Tariana Turia?  E ai ki ngā pōti, kei te toru tekau mā rua ōrau, te ihu o Chris McKenzie e tau ana, ēngari kei te whaiwhai hāere a Adrian Rurawhe i tōna whiore.

Hei tā Jones, “Ko te mana o Tariana tāna anō, kei a Chris tōna ake mana, ko te kōrero tērā 'Ka pū te rūhā, ka hao te rangatahi'.  Anei tōna rangatahi e tīmata te hao ake i ngā pōti engari he mahi nui ki mua i te aroaro mō Chris.  Kia hoki atu ki ngā pōti.”

Ko te koremahi tētahi take nui i te rohe nei, ā, kei te hiahia tautoko ngā kaipōti.

Nā reira, koirā ngā whakaaro o naianei mai i ngā kaipōti o te Tai Tonga me te Tai Hauauru, heoi ahakoa he toru wiki e toe ana ki te rā pōti, he whakataetae rae ki te rae e haere ake nei.