He pakanga tata kei te haere i waenga i ngā kaitono matua o te Tai Hauāuru

Nō te rangi nei ka puta ngā tatauranga o te tauwhāinga pōti a Te Kāea mō te rohe pōti o Te Taihauāuru, ā, te āhua nei, he tino whakataetae kei te haere ake.

E tātāhau ana te pakanga i waenga i ngā kaitono matua e rua mō te tūru o Te Tai Hauāuru.  

Kei mua ko Chris Mckenzie o te Pāti Māori me te toru tekau mā rua ōrau.  I muri tata mai ko Adrian Rurawhe o te Rōpū Reipa me te rua tekau mā iwa ōrau.  Tūturu, he whakataetae nui kei te haere i waenga i te tokorua rā.

Whai muri mai ko Jack McDonald kei te tekau mā tahi ōrau, ā, ko te kaitono mō MANA ko Jordan Winiata kei te tekau ōrau. 

Nā, ko taua nama anō rā, te tekau ōrau, mō te hunga kāore i te mōhio, ā, ko rātou kāore i te hiahia pōti, kāore rānei i te hiahia ki te tuku pōti ki aua kaitono kei te waru ōrau.

Kāore a Chris McKenzie mō te konatunatu kupu i a ia e ārahi ana me te toru tekau mā rua ōrau.

I pōhēhē hoki a Adrian Rurawhe ko ia tēnā ka ārahi i ngā tatau.

Ka mutu, ahakoa e mea ana ngā whika kei mua a Chris Mckenzie mā te toru ōrau, kore kore rawa a Adrian Rurawhe i te whakaae.

Āpiti atu, he taumaha nui kei runga i ō rāua pakihiwi. 

Mō Chris McKenzie, ko te pupuri i te tūru mō te Pāti Māori kua roa e nōhia ana e Tariana Tūria me te whakarīrā kia tokomaha tonu ā rātou nama ki rō Pāremata.

Ko te manuka mā Adrian Rurawhe, he kawe ake i te ōhakī o te whānau Ratana, nā rātou hoki te tūru i kaha pupuri i ngā tau ki muri mā Reipa.  

Ki kaitono kē, ahakoa he tekau mā tahi ōrau noa te tautoko mā Jack McDonald, hei tāna kē ko te pōti pāti tāna e whai nei.

Ka mutu, ko te kanohi tauhou rawa atu ko Jordan Winiata, mā MANA.  He wātene Māori kei te mura o te ahi mō ngā take o Te Tai Hauāuru.

Ka pai tēnā kaikā, engari e mōhiotia ana kotahi noa te whawhai kei te haere ki te Tai Hauauru, ā, ka riro ki a Chris McKenzie, ki a Adrian Rurawhe rānei te whiu whakamutunga.