He pikinga anō o te utu penehīni ka pākia ki ngā pūkoro

Kaikinikini ana te utu o te penehīni nā te whakapikinga ake anō o te tāke penehīni kua whiua e tēnei Kāwanatanga mō te wā tuarua.

I tēnei rā tonu, kua piki ake te utu o te penehīni mā te toru hēneti.

He kaupapa nā te Kāwanatanga hei mahi pūtea ki te whakatū rori hōu.  Heoi ki te nuinga o ngā tāngata, he nama anō kāhore e pīrangitia ana.

Mō te kaitaraiwa waka penehīni, he rua tekau mā whitu tāra noa i te tau te ngau ki te pūkoro.

Engari anō mō te kaitaraiwa waka diesel, he ono tekau tāra anō i te tau mō te hinu me ngā utu rori, ka ngau i te pūkoro.

Ko tā ngā rangahau, ko ngā pakihi e tuku tīkiti whakaheke utu ana ka muia e te kaihoko.

Ko te āhua nei, he kura nui te penehīni, nā reira, me penapena ka tika.

Me te mea anō, ka kitea pea tātou i te tokomaha e aro atu ana ki ngā waka tūmatawhānui huri noa i te motu, te hoki atu rānei ki ngā mahi ō mua, 'mā raro'.