He pū kōrero, he piki tūranga

Te Kuru o te Marama Dewes

Kua tū mai ngā pū kōrero o tēnā moka o tēnā tarawāhi o tēna o ngā kura o te motu ki Rongopai marae ki Te Tairawhiti mō te whakataetae Ngā Pū Kōrero mō Āpōpō a Te Ropu Wāhine Māori Toko i Te Ora.

Tekau mā tahi tau te pakeke o Jacqueline Te Kani-Nankivell o TKKM o Ngā Uri a Māui, hei tāna, “Ko taku kete tīpuna ko taku kete mātauranga, nō reira kei te kōrero ahau e pā ana ki tōku kuia a Nanny Jackie Te Kani ko ia tētahi o ngā perehetini ō mua o Te Ropu Wāhine Māori Toko i Te Ora.”

Hei tā Yvonne Mita o Te Rōpū Wāhine Māori Toko i Te Ora, he wāhi haumaru e puta ai te reo rangatahi.

“Hei kohikohi i ngā rangatahi kia mōhio mai mātau o rātau whakaaro mō te ao katoa mō ngā kaupapa o te ao,” te kī a Yvonne Mita.

39 nga tauira mai i nga topito o te whenua i whakakao atu ki Rongopai marae, hei whakapuaki i ō ratau ake reo, i ō ratau ake whakaaro mō te oranga o te reo me ōna tikanga.

Tekau tau te pakeke a Paerau Dillon o Te Kura o Ngāruahinerangi, ko tāna “Ki te taha o tōku pāpa, ko te whakangau poaka, te ako pēwhea ki te hopu i ōku ake kai, ki te taha o tōku māmā, ko te reo me ōnā tikanga.”

He pikinga ngākau mō Te Rōpū Wāhine Toko i te Ora i tā rātau kite atu i ngā kōhine e tū māia ana i roto i ngā mahi tuku kōrero.

Ko tā Yvonne Mita, “Kia tū ngā kōtiro katoa o te ao Māori i runga i tō rātau ake kaha ki te mōhio nō whea rātau.”

Hei tā Rongomaiwahine Te Rau o Patuwai o TKKM o Ngāti Kahungunu o Te Wairoa, “Ko tāku nei kaupapa he taonga te kōtiro he taonga hoki te wahine, i whiriwhiria e au i tēnei kaupapa i runga i te kōingoingo o tōku nei ngākau ki ōku kōkā, ōku kuia, otirā ki ngā atua wahine.”

Hei āpōpō tūwhera ai te hui-ā-motu a Te Rōpū Wāhine Toko i te Ora.