He raru nui e pupū ake ana i te Pāti Māori

I kōrero tahi a Piripi Taylor raua ko Maiki Sherman mo ngā take tōrangapū o te wā, matua rā ko nga raruraru e pā ana kit e Pāti Māori me tā ratou kaitono mo te turu i Te Tai Tokerau.

Ae mārika, kua pakaru mai te haunga i roto i te Pāti Māori.  Katoa tēnei i tīmata ake i ngā Tatau Pōti a Whakaata Māori, tōna tikanga he raru nui ērā mō Hone Harawira engari inaeanei ko te Pāti Māori kē te papa.

Āpiti atu, te āhua nei he hōhonu ake te raru i te hiahia a te taumata o runga kia whakatahangia ia i te turu o Te Taitokerau.

Ko Peter Tashkoff tētahi kaitono o mua o te Rōpū ACT, he tangata kua tāmia ki ngā whakapae whakararu i te rōpū, ā ko ia tērā i ārahi i te poronga o Rodney Hide hei kaiārahi.

E ai ki a Te Hira Paenga ki a mātou o Whakaata Māori, kāore tērā tohutanga o Tashkoff i tau pai ki a ia, otira kāore ia i pīrangi ki te mahitahi ki a Taskoff.

E ai ki te hunga kua kōrero mai ki a mātou, nō roto tonu i te Pāti Māori, e tōtara wāhirua ana rātou, ki tētahi taha ko te taumata o runga, ko Tariana Turia tētahi. 

Ā i tērā atu taha ko Peter Sharples me tōna whānau, e mōhiotia ana ko Te Hira Paenga tana tama.

Ko te pātai nui ki ngā kaipōti pena e tau pai ana tēnā rautaki a te Pāti Māori ki a rātou, arā kia heke iho a Te Hira Paenga i tāna tūnga kaitono, kia riro kē i a Kelvin Davis tēnā tautoko ā-pōti nei.