He rōpū nō Tūhoe e haere ana ki Ūropi

updated

Ko Jackie Te Kurapa o Ngāi Tūhoe tētahi kei te haere ki Ūropi a tērā tau hei whakamaumahara, hei hikoi i ngā tapuwae o ngā hoia o Aotearoa i haere ki te pakanga tuatahi. I tae ia ki ngā whakamaumahara i tū ki Piripari, Te Waimana Kāku, hei mahara ki tōna koroua a Pa Te Amo i haere ki te pakanga tuatahi o te ao i whakawhiwhi hoki i te mētara o Tūmatauenga. Whitu tekau mā whitu ngā hoia nō Tūhoe i haere ki te pakanga tuatahi o te ao. Kei konei ngā uri o ērā hoia i tēnei rā, ā, hei tērā tau ka whakawhiti ki Ūropi. “He hikoi ki te kawe i ngā uri o ngā koroua nei, i roto i ngā whakapapa o ngā tamariki kei te haere, pā tata katoa atu” ki tō Hemana Waaka, kaiwhakarite o te haerenga. Ko Jackie Te Kurapa tētahi kei roto i te rōpū e whakawhiti ana ki tāwāhi hei māngai mo tōna whānau. “Kei te haere au mo taku koroua, i haere ia ki te pakanga tuatahi, ana, ko Pa Te Amo tērā, i whakanuia i tērā tau ki tētahi mētara, ka mutu, kei te takahi au i ngā tapuwae o taku koroua”. Wha tekau mā rima ngā mema nō Tūhoe kei te whakawhiti ki Ūropi, tekau mā rua o rātou he rangatahi e haere ana ki Te Wharekura o Ruatoki, me Te Wharekura o Huiarau. “Kāre pea rātou e ngaro, ina rā kei konei tātau, ngā uri whakatipu, nō reira kei roto i te toto, kei roto i ngā kanohi e whakaora ana i a rātou”. Ka wehe te rōpū ki Ūropi hei te Poutu Te Rangi o tērā tau.