He rōpū whakatipu hua kiwi e para huarahi ana mā rātou ake, ki roto i te ao Āhia

I te whakatārewatanga o ngā whiriwhiri kōrero mō te TPPA, tērā tētahi rōpū whakatipu hua kiwi e para huarahi ana mā rātou ake, ki roto i te ao Āhia.

Ahakoa he waewae tapu au ki Hapāna, ā, ahakoa te rerekē o te huarere,  me kī he orite ētahi tikanga a te Māori ki te haukainga nei, pērā i te manāki manuhiri me te kōrero ngātahi, kanohi ki te kanohi. 

Ā, koira te take e rere mai ana tētahi tira pakihi Māori ki konei a hei te ahiahi rāno tau mai ai rātou. He rua tekau ngā kaipākihi Māori ka tae mai nō ngā tarahiti whenua Māori kua whai pānga atu ki te huakiwi.

Ā, ko tā Te Kāea e whai nei, he kite i ngā taurahere ki waenga i ngā kaihokohoko o konei me Hingapo me ngā kaipākihi Māori o te wā kainga.

Ko ngā tino mātanga o te makete huakiwi ka tae mai, ko Neil Te Kani rāua ko Anthony Ruakere o  Te Awanui Huka Paketahi, haunga i a rāua, ka tae mai hoki te heamana o FOMA, a Traci Houpapa, me te mātanga pākihi Māori a Kingi Smiler.

Ko te tikanga he whā tekau mā toru piriona tāra te wariu o ngā rawa Māori i tēnei wā, hēoi he nui noatu ngā painga ka puta i tō rātou haerenga mai ki Āhia, i runga i te mōhio koinei te hunga e matekai ana ki ngā hua a te Māori.