He tauira Māori e haere ana ki te Hui Iwi Taketake NRL

Te Kuru o te Marama Dewes


Tokowhā ngā rangatahi Māori kua kōwhiria kia haere ki te hui Rangatahi Iwi Taketake NRL ki Poihākena, ki Ahitereria.  Ono tekau mā waru ngā rangatahi iwi taketake kua kōwhiria e ngā karapu NRL kia tae atu ki te hui nei arā, kia whakaakongia rātau ki ngā pūkenga me ngā mahi a te kaiarahi.

Kei te whakangungu i ngā kaiarahi e ara ake nei.

Ngawari Pio o Te Kura Taitama Tāne o Grammar, “Kia tū au hei raukura mō taku hapū, iwi, me tōku whānau. kia whakaatu ki ngā rangatira kei waho rā e taea ana mātau ki te mahi i ngā mea katoa.”

Ka whakahaeretia te hui rangatahi iwi taketake e te kamupene iwi moemoeā, arā ko Mirimiri, ko te ngako o te hui he whakakī i ngā whāruarua kei te ao mātauranga, otirā ki ngā whiwhinga mahi.

Erita Thomson o Te Kura Tuarua o Manurewa, “Kua huakina te kuaha, nā reira e whai ana ahau i te ara. Te tūtaki i ngā rangatahi, tū hei rangatira mō taku whānau, me te ako i ō rātau ahurei.”

Nā te kapa Warriors te tokowhā nei i kapo i te uma o Moko Foundation ki Kaitāia, arā, he kaupapa whera i ngā huarahi hauora, mātaunga, kaiarahi anō hoki.

Ngawari Pio, “Hiahia ana au te whai i ngā mea hou me kī, ngā whakaaro pai, kia pai ake ōku whakaaro hei arahi i ahau. Kia whai kitenga pea, me he hononga ki ngā tāngata puta noa i te ao.”

He tekau mā rima, he tekau mā ono ō rātau tau, ā, tokorua kāre anō kia eke rererangi, ka mutu, hīkaka katoa ana rātau ki ngā pae kei mua.

Ko tā Shalynd Ra'ui o Te Kura ā Rohe o Taipa, “Ka tū au hei rangatira mō tōku kura, tōku iwi tōku hapū. Ka hanga hei momo matakū ki te haere ki tēnei engari tino harikoa ana au.”

Kei te pīrangi rātau ki te whakatenatena i ngā taiohi kei o rātau ake hapori.

Ngawari Pio, “Kia kore ai rātau e haere ki ngā wāhi kino, kia tū ai rātau hei tauira anō hoki, ōrite kia ahau. Koira tōku tino hiahia kia kite ai rātau e taea ana tātau.”
Ka tū te hui ki Poihākena a te Wenerei, tae noa ki te Rātapu.