He tautoko i te hikoi mo te rohe pōti Māori

Kei te koke whakamua te tohe ki te whakatū rohe pōti Māori ki Whakatāne i te putanga o te marea ki te hīkoi i ngā rori ki te whare kaunihera ki te tuku i te pōti mō te mōtini nei. He hikoi i tautokohia e te koromatua o mua o Ngāmotu, e Andrew Judd. Ko te karanga kia whai kanohi te Māori ki runga i te kaunihera ā rohe engari ki tā te koromatua ō mua mo Ngamotu kei runga te korero kei raro te rahurahu.

“Kei reira tonu ngā aukatitanga te mataku e pā ana ki tētahi rohe pōti Māori, ko te mea mīharo ka whai tūnga te Māori ki te tēpū”. Nō tērā tau i pōti ai ngā kaikaunihera o Whakatāne kia whai whakaaro rātou ki te whakatū i tētahi rohe pōti Māori. E ai ki te koromatua tuarua o Whakatāne a Judy Turner ko ngā korero mai i ngā iwi o tōna takiwa he kaupapa tēnei e hiahiatia e rātou. “Me titiro tātau ki ngā huarahi e tohu ana i te hunga kāre i te pōti, mo te Māori ko te kore reo, kanohi i te tēpū tētahi o ngā raru”.

Ka whai atu a Whakatāne i a Kaikōura, Te uru o Te Moana a Toi, Manawatū me Te Papaioea i a rātou e tuku urupare ki te hunga kei o rātou rohe mena rānei kia whakatū tūranga ma te Māori. Ki tā Rita Tupe o Waiohau, “kei te tautoko au i tēnei kaupapa, na te mea kua ngaro haere ētahi o ngā hīkoitanga e pā ana ki tātau te iwi Māori”.

Mo Jackie Te Amo-Te Kurapa o Ruatāhuna, “anō nei e titiro ana ki tēnei mea te rangatiratanga, ā, te mana whakahaere, e whai wāhi atu ai he Māori ki runga i ngā kaunihera, nō reira kei te titiro ki te anamata ki o tātau tamariki”. Kāre anō kia mutu ngā mahi, hei te tekau mā iwa o tēnei marama mutu ai te wāhanga tuku pōti hei te poupoutanga o tērā rā.