He tētē kura anō e ara ake ana ki te kapo ake i te tūru Māori o Tāmaki Makaurau

Nā te hekenga iho o Tākuta Pita Sharples, he tētēkura anō e ara ake ana ki te kapo ake i ngā pōti toru tekau mā whā mano kua rehita ki te rārangi pōti Māori i te tūru Māori o Tāmaki Makaurau.

Ki te pae o Kōwhiri Tekau Mā Whā inapō, kitea ai ngā kaitono ihuputa tokowhā i te papa taupatupatu.

Kua horo i a Reipa te piriti ki te Pāti Māori, i ngā kōrero a te kaiārahi a David Cunliffe.

Ahakoa ngā kōrero o te tatauranga pōti a Whakaata Māori e mea ana, pēna ka mana te noho a Te Pāti Māori, he ono tekau mā toru ōrau o ngā kaipōti o Tāmaki Makaurau ka hiahia kia piri tahi rātou ki a Reipa.

E ai ki ngā tatauranga mō te tau rua mano tekau mā toru, kei te takiwā o te toru tekau ōrau o Ngāi Māori e noho ana ki Tāmaki Makarau, he kāinga tūturu, ā, nō rātou tonu te kāinga rā i hoko.

Koira te pātai ia, he aha tā Kereama Pene o MANA, a Rangi McLean o te Pāti Māori, a Marama Davidson o Te Rōpū Kākariki, a Peeni Henare o Reipa mahi ki te hiki i ngā tatauranga nei, me te whai whakautu ki te korenga o ngā whare i Tāmaki Makarau.

Hei āpōpō ka wātea te pae o Kōwhiri Tekau Mā Whā ki ngā kaitono o Hauraki-Waikato, ki reira tūwhera ai ngā tatauranga pōti hōu, e titiro ana ki ngā pōtitanga mō taua rohe.