He tohu whakamahara ki ngā tīpuna i hinga ki Ōweta

Te Kuru o te Marama Dewes

Kotahi rau rima tekau tau i te kōhurutanga a Te Kooti i ngā rangatira e rima o Rongowhakaata ki Ōweta Pā ki Manutuke, kua hui ngātahi ngā uri o Rongowhakaata ki the hura i tētahi pōhatu whakamahara ki ō rātau tīpuna.

Hai tā Tapunga Nepe o Rongowhaata, “E rima ngā tīpuna e mōhiotia ana i turakina e Te Kooti me ōna tāngata i whai i a ia, nā reira, ko te kaupapa nei he whakamahara ki ērā tīpuna, he rangatira ērā tīpuna nō roto i a Rongowhakaata.”

Nō te Noema o te tau 1868, tokorima ngā tīpuna o Rongowhakaata i kōhurutia e Te Kooti, arā, ko Paratene Tūranga, ko Iraia Riki, ko Ihimaera Hokopū. I patua hoki a Hira Te Kai, ā, mate atu ana i te marama o Tīhema.

Ahakoa ngā te riri i heipū ake i a Te Kooti me ngā mate i pā ki a Rongowhakaata, hei tā Nepe kei roto tonu i te whakapapa.

Ko tā Tapunga Nepe, “E kore e tāea te māwetewete. I te mea ko tētahi taha o tērā whakapapa e hāngai tika ana ki a Te Kooti, ko tētahi wāhanga o te whakapapa e hāngai atu ki ngā tīpuna i hinga.”

Kai te whakamoemiti tonuhia ngā karakia o te hāhi Rinagtū a Te Kooti e ngā uri o Rongowhakaata.

“Taka rawa mai ki ēnei rā kāre au i te kī kei te kaha te hāhī ki konei engari ko Whakatō te marae e kawa tonu ana i ngā rā o te Ringatū, i ngā karakia o "Te Matua Tangata”, te kī a Nepe.

Ko te wāhi whenua o Ōweta e puritia ana e tētahi kaipāmu Pākehā, kua whakaae atu ki a Rongowhakaata kia whakatū ai i tētahi toka whakamaumahara.

Ko tā Tapunga Nepe, “Kua whakaae mai ia kia takahia mai ōna whenua e ngā uri e Rongowhakaata, e wai ake, rātau e hiahia ana, te titiro ki a rātau.”

Hai tāna anō hai tā Nepe ko ngā uri Rongowhakaata o ēnei rā te tatau pounamu i ērā mate i pā ki Ōweta.