He tūāpapa ahurea e tauutuutu ai ngā iwi tūturu

Te Kuru o te Marama Dewes

Ka peka atu te Tumu o Ngā Moutere o Tahiti ki Uawa hei manuhiri mā Te Aitanga a Hauiti. He hua tēnei i puta i te taenga atu a Te Aitanga a Hauiti ki Tahiti Nui arā he whakatinina i te hekenga mai a te tohunga waka a Tupaia i te tau kotahi mano, whitu rau, ono tekau mā iwa.

Ko tā Pirihira Poi o te tira haere, “He ōrite te reo o Tāhiti, mēnā he pōturi rawa tā rātau kōrero ka mārama mātau he aha a rātau kōrero.”

Hei tā Chaney Manuel o te tira haere, “Ōrite te kupu motu ki tō tātau nei kupu motu, wai, whenua... Ka hīkoi mātau ki runga i tō rātau marae, ka tū ko ngā whaikōrero me ngā waiata, ōrite tērā āhuatanga.”

E rima tekau mā rima ngā Aitanga a Hauiti i peka atu ki Tahiti ki ngā wāhi whakahirahira.

“I ako mātau nō Raiātea a Tūpaia, i eke a ia ki runga i te kaipuka Endeavour i Māhina”, te kī a Pirihira Poi.

He tohunga whai whakaaro nui a ia, i ako mō te wāhi i wehe ai rātau i a Tahiti ki Taputapuātea, i haere mātau ki te wai ki reira waiata ai, me te tuku mihi ki a ia ki a rātau mā i wehe atu mai i reira.

Ko Mahina i Tahiti rāua ko Tūranga he tuakana taina i ngā tau e tekau mā rima kua taha ake nei, arā he hononga whakapapa e whanake tonu ana.

“I runga tētahi o ngā nanny i te puke ko tōna karanga 'haramai, haramai' ka pēra hoki mātau. Mōrea, ētahi i hongi, ētahi i mahi mā te kihi e rua ngā wā. Ētahi o ngā koroua i hongi mā te mahunga, āhua hātekehi tērā.”

Nō te māpu Hauiti nei i Tahiti, ka waiata i tētahi whare kai, nāwai, he kiriata tērā e horapa tonu nei i te ipurangi.

“I whakahoahoa mātau ki a rātau nā reira e haramai ana ō mātau hoa kei te kōrero tonu mā runga i a pukamata, īmera hoki.

Hei te Ōketopa tae atu ai ngā manuhiri o Tahiti ki Uawa.