'He wā tē taea e au te tīni'

Te Kuru o te Marama Dewes

Nā tētahi aituā i te wā haurangi i whara kikino ai te roro o Hyrum Paea. Ahakoa te kī a ngā tākuta, e kore rawa ia e hīkoi anō, e kōrero hoki, kua turakina e ia ngā ārai, ā kua tahuri ia ki te kōrero i ōna wheako, me kore e mārama ai ki te tangata ngā aupiki me ngā auheke o tōna ao.

He pō haurangi, ka taka iho a Hyrum Paea i te kei o te taraka, ka tukitukia e tētahi atu motokā, nāwai ka whara kino nei.

Hei tā te kaitakawaenga Māori i Te Kaunihera o Te Tairāwhiti, hei tā Walton Walker, “Me mihi atu ki a ia mō tōna kaha ki te whai atu i tēnei kaupapa kia kore ai wētahi atu e pā mai i tēnei, me kī, whara i runga i a rātau i te wā haurangi.”

Nō taua wā o te aituā, kua whitu ngā tau a Paea me tōna whānau e whakamāui ake ana i a ia anō.

Ko tā Walker, “E mōhio ana tēnei tangata, tēnei tama hoki i ngā āhuatanga mēnā ka haere haurangi koe i runga waka, tērā pea ka pā mai tēnei āhuatanga i runga i a koe.”

E ai ki ngā tatauranga a Te Kaunihera o Te Tairāwhiti, ko Te Tairāwhiti te tuarua o ngā wāhi kino i te motu mō te taraiwa haurangi, te tukituki motokā nā te tere o te haere, mō te waka kotiti hoki.

“E kīa nei he nui tonu ngā mea Māori nei e pā ana ki tēnei momo āhuatanga te wā ka inu ka kai paipa rānei me te haere ki ngā pāti ka taraiwa tonu i runga ō rātau nei motokā haurangi rawa atu”, te kī a Walker.

Ko te kokenga hōu nei nā Te Kaunihera o Te Tairāwhiti, he whakahau i te hapori kia tika ngā mahi me ngā whakaaro mō te taraiwa haurangi.

“Me whakatutuki, kia kaua tēnei mahi tēnei āhuatanga e whakapā mai nei ki ō tātau tamariki”, te kī a Walton Walker.

Hei tā Paea, 'ka tarea tonu te ngahau waipiro-kore nei, me ū noa ki a koe anō'.

Toro atu ki a www.onemomentintime.co.nz mō ngā taipitopito.