He wero hou kei te haere e kī ana ko 136 Day Pakanga Challenge

updated

Kua whakatakatōria tētahi mānuka hou ki te hāpori e wero ana i te tīnana, te wairua, te kai tōtika me te ahurea o te tangata e kī ana nei 136 Day Pakanga Challenge.

Nā Brad Totorewa nō Ngāti Naho ki te rohe o Rangiri te kaupapa i kōkirihia, e whakaawea ana i te tū toa o āna tūpuna i whawhai i te pakanga ki Rangiriri.

Koinei te ao mo tenei hunga mo nga ra 136 e haere ake nei.

Koira te mānuka kaupapa e kōkiri ana a Brad Totorewa hei akiaki i te tangata ki tiaki i aia anō.

E ai ki a Brad Totorewa, “Tirohia tātou ki ngā tatauranga hauora, te ao Māori, kei raro rāno tātou e pūtu ana.  Mehemea, he mahi hapori, hauora, mauhere, mātauranga.”

Otia, hei tāna i ahu te whakaaro tuatahi, i te hokinga mahara ki ona tipuna i pakanga ki Rangiriri.

Hei tā Totorewa, “He mahi whakahōnore, i te mea, nā rātou tonu i tuku tō rātou oranga katoa, mate rāno mō te kaupapa, mate rāno rātou kia purutia rawatia tātou ki te whenua.”

Ki tā Ngarino Watt, “He kaupapa whakahirahira tēnei mō tātou te Māori, i runga i ngā āhuatanga ka ākongia ana e tātou i ngā āhuatanga o ngā mātua tūpuna e nohonoho i roto i ngā rā o nehe, ara, ko te kai māra, ko te whakapakari i te tīnana, ko ngā kai atua.”

Ia rā, he tūmomo werohanga rerekē kua whakaritea, mō te kotahi haora, ka tukuna mā te pukamata, whēra i te Kāri Mohoao, penei i nga mahi keri rua, whiu toka me te amo i nga pēke riwai.

E ai ki a Ngarino, “Ko te Kāri Mohoao e kīa nei, Anei te wero mō tēnei wiki, tūtaki tātou i ngā maiororo o Rangiriri, haria mai he paraikete, koina noaiho ngā kōrero.  Ka tae mai ngā iwi ki reira, ki reira ka tuku ngā māhi ki a rātou. E wātea ana te kaupapa nei ki te katoa, tamariki tae noa ki te kaumātua.”