He whakaari Reo Māori e wero ana i te reo auraki

Te Kuru o te Marama Dewes

Ko te whakaari makaurangi rongonui a te kaitito o Wiwī nei a Uegēne Ionesco, arā 'He Tūru Māu', kua whakahoutia ki te reo Māori, te reo o Hāmoa, te reo Pākehā me te reo Cantonese anō hoki. Hei tā te kaiwhakaari Māori, hei tā Amber Cureen o Te Pou Theatre, he wero i te whakaaro ko te reo Pākehā te reo auraki.

He Tūru Māu? Koira te wero a ngā kaiwhakaari nei ki te hunga e matenui ana ki te reo.

“He wero tēnei ki ngā whare whakaari o Tāmaki, o Aotearoa whānui, kia tūwhera ngā kuaha ki ngā whakaari Māori, kia Māori ake ēnei wāhi,” te kī a Cureen.

Ko Tainui Tukiwaho te kaitohutohu, nā Ani-Piki Tuari te whakaari i whakamāori kia hāngai ki tētahi horopaki Māori.

“Ahakoa kei roto i te Reo Māori, te reo Cantonese, te reo Pākehā, te reo Hāmoa, te reo Wīwī, he whakaari rerekē rawa atu,” te kī a Cureen.

Hei tā te kaiwhakaari Cantonese, hei tā Audrey Chan, ko te reo Cantonese te reo o ngā Hainamana tuatahi o Aotearoa. Hei tāna anō kei te whai hoki rātau kia mau tonu ai ki tō rātau ake reo.

“I know that for some Chinese born here they would like to sort of revisit their roots in their own original language,” te kī a Chan.”

Hei tā ngā kaiwhakaari he tino wero te ū ki Te Reo, heoi arā anō ngā hua ka taka mai.

Koia ko tā Antonio Te Maioha, “Ka ako ahau i ahau e mahi ana, nā te mea i roto i tēnei tūmomo mahi ngā mahi ā Rēhia te mahi whakaari i ētahi wā he uaua te haere ki ngā wānanga reo.”

“He mea uaua ki ahau ki te whakaputa i te reo mō tētahi whakaari katoa engari kua eke au, ia rā ia rā ka eke haere au,” te kī a Cureen.

Ka tū te whakaari nei atu i te Rāapa ki te Rāhoroi ki te whare whakaari o Te Pou.