He whakahokinga mahara hei whakatuwhera i te whare pupuri taonga o Kamupene C

He rangi hītori nui mō te iwi o Ngāti Porou, ko ngā hoia tērā o te kamupene C i whakahonoretia mō rātou i whakaheke toto ai mō tēnei whenua te painga, i te whakatuwheratanga o te whare whakaruruhau i ō rātou taonga i Turanga Nui a Kiwa inanahi.

He taitama ono tekau nō konei, a, he mahi whakaari e aro pu ana ki o rātou tupuna, te rōpū Māori tuatahi i wehe atu ki te pakanga, he kotahi rau tau ki muri.

I takohatia ngā kākāhu e Tā Peter Jackson, ngā kākāhu ōrite ki ērā o ngā tupuna.

Torutoru noa iho ngā hoia o kamupene C e ora tonu ana i enei rā, otira, ko Nolan Raihania tētahi o rātou, he waru tekau mā waru ōna tau.

Hei tā Nolan, “Pouri te ngākau, engari, mā te ataahua o te whare nei ka hoki ngā whakaaro ki ngā wā ataahua tā mātou noho tahi, engari, ka kuhu atu ki roto, ka pouri anō ki te kite i o rātou whakaahua katoa o rātou i rere e iri mai ana.”

Ahakoa he mea whakahonore te whare nei i nga mahi o kamupene C, kei te iri hoki ko ngā taonga tuku iho i takohatia e ngā uri whakaheke o ngā hoia o Pakanga Boer.

Hei tā Matanuku Kaa, “Kāore he kōrero i tua atu mō tēnā, rongonui tōnā ataahuatanga, ko ngā mahara kei roto, he maumaharatanga kei a rātou kua wehe atu ki te pō i ngā pakanga o mua.”

I kapia ngā tiriti mō te tini ngerongero i tae mai nei ki te tautoko i te whakatūwheratanga o tēnei whare kua roa e whakapakari ana, hei taonga makohakoha mo ngā uri whakaheke.