He whakamātau i ngā wai o Rio te mahi i mua tonu i te whakatatae ā-ao Va'a Sprints

Rahia Timutimu

He whakataetae kua roa e tāria ana e Aotearoa, e te Ao whānui anō hoki, ananā ko ngā whakataetae Waka Ama o te Ao ēra, e kōkiritia ana i Pārihi.

Ko te rā tēnei e whakataiao ai ngā kaihoe o Aotearoa e rite, rite mārika ai rātou mō te kakari kei mua i te aroaro.

Hei tā kōrero a Te Arawhanaunga Minhinnick, “He pai rawa ki te kite i nga kaihoe rereke, etahi o ngā tima kua kitea e au no ngā rohe rereke engari e hoe ana hei kapa kotahi.”

I te rā nei, i whai wāhi ai ngā kaihoe takitahi me ngā kapa takiono ki te takiwā i whakaritea ai mō te kaupapa nei, kia waia ai rātou ki ngā āhuatanga o ēnei wai hou.

Ko ētahi o taua hunga ko ngā toa whakaihuwaka tonu o te motu, arā ko Tupuria King te toa takitahi o te wā mō te hunga ika ā Whiro, tēnei kua tae mai ki te pakanga ki ngā kahika o te ao.

Tērā hoki a Tōrino te kapa wāhine toa o te wā mō te wāhanga ika-ā-Whiro, nō te karapu waka ama tonu o Ngāruawāhia. 

E mōhio pū ana rātou me hūkere te hoe mō te hemo tonu atu e paku kātata ai rātou ki te mētara kōura i konei.

I te aonga mai o te whakatūheratanga o ngā whakataetae nei, he kotahi rā e toe ana kia rite ai ngā kapa katoa mō te  tīmatanga mai o ngā whakataetae ā-ao nei, ka tū ki konei, ki Pārihi.