He whakanui, he whakahamara atu rānei?

Te Kuru o te Marama Dewes

E hiahia ana te mema pāremata o Nāhinara, a Paul Goldsmith kia whakanuia te tūtakitanga a te Māori me te Pākeha ki te hui Tuia Encounters 250. Ko tā te kaupapa nei he whakanui i te rua rau e rima tekau tau nō te taenga mai o Captain Cook me tana tira o te Endeavor. Heoi, hei tā te Minita Paihere Karauna Māori, he hui whakamaumahara kē, ehara i te hui whakanui.

Hei tā te Minita hei tā Davis, “Korekau mātau e mea me whakanuitia te taenga mai a Kuki, i te mea ko taua parekura i taua taima aua tūpuna o Te Tairāwhiti kua puhia, ehara tēnā he mea hei whakanui.”

Hei tā Paul Goldsmith o te pāti Nāhinara ki a Te Ao Māori, "He pai, he kino hoki i puta i te hononga atu ā te Māori ki te toenga o te ao, kāre i hou te rongo i ērā tūtakitanga katoa.

Hei tā Davis, “Engari mōhio ana tātau i te taenga mai o Kuki ki konei, i te noho ō tātau tūpuna ki konei e whitu rau tau i mua. Engari te taenga mai a Kuki ki konei, mōhio ana tātau he parekura i tae mai ki ngā iwi o Tūranga, nā reira koia tō mātau whakaaro kia kaua tāua e whakanui i tēnei āhuatanga engari kia maumaharatia.”

Ko tā Paul Goldsmith ki a Te Ao Māori, "Me whakanui kē i ngā āhuatanga kua hangaia ngātahitia e te Māori me te Pākehā, atu i ōroko taenga mai a te Pākehā. Me te meka nei i tūtaki ai. Me ōna pokapoka katoa."

I ngā whakahaere a Tuia 250, he ope waka Pākehā, waka haurua anō hoki, ka whakatere ki ngā wāhi i tae atu rā a Kāpene Kuki me te Kaipuke Endeavour.

Ko tā Kelvin Davis, “Ko te mea pai ko te mea nui kia whai wāhi tātau ki te kōrero o tātau ake kōrero ngā kōrero o tātau tūpuna, ki te whakanui i o rātau mahi. Nā rātau i tere mai mā runga te Moana Nui ā Kiwa, me whakanuitia wērā mahi nō rātau koia te mea nui.”

Atu i te Oketopa ki te Tīhema haere ai ngā waka i wā rātau haere.